Deputadu Joaquim Dos Santos, Imajen Tatoli/Antonio Goncalves.

DILI, 01 jullu 2021 (TATOLI)—Komisaun A ne’ebé trata asuntu Konstitusionál no Justisa, finaliza ona redasaun finál ba lei órgaun administrasaun eleitorál, resensiamentu eleitorál no eleitorál ba Prezidente Repúblika.

Notísia Relevante: PN altera ona pakote lei eleitorál tolu iha finál globál

“Komisaun A finaliza ona redasaun finál kona-ba lei tolu kona-ba alterasaun ba lei órgaun administrasaun eleitorál, resensiamentu eleitorál no eleitorál ba Prezidente Repúblika. Ohin kedas Komisaun A haruka ba Prezidente Parlamentu Nasionál atubele konsidera. Aban ka bainrua, haruka ba Prezidente Repúblika halo promulgasaun,” Prezidente Komisaun A, Deputadu Joaquim dos Santos ‘Boraluli’, informa ba jornalista sira, iha uma fukun, kinta ne’e.

Iha loron 28 juñu 2021 liubá, Parlamentu Nasionál (PN) altera pakote lei eleitorál tolu kompostu hosi lei órgaun administrasaun eleitorál, lei resensiamentu eleitorál no lei eleitorál ba Prezidente Repúblika iha finál globál.

Parlamentu Nasionál altera ona artigu sira mak hanesan 8, 12, 14 no 15 iha lei órgaun administrasaun eleitorál iha finál globál ho rezultadu votasaun a-favór 62 kontra 0 no abstensaun 0.

Reprezentante povu sira mós altera ona artigu hamutuk 13 hosi lei resensiamentu eleitorál mak hanesan artigu 12, 13, 15, 16, 17, 22, 23, 26, 29, 30, 34, 36 no 51 iha lei resensiamentu eleitorál iha finál globál ho rezultadu a-favór 62, kontra 0 no abstensaun 0.

Nune’e mós altera artigu hamutuk 11 mak hanesan 19, 31, 32, 36, 38, 39, 40, 41, 44, 45 no 68 iha lei eleitorál ba Prezidente Repúblika ho rezultadu votasaun a-favór 62, kontra 0 no abstensaun 0.

Alterasaun hosi lei eleitorál tolu ne’e ,la’ós substansiál maibé halo de’it emendasaun. Purtantu introdusaun foun iha lei eleitorál ba Prezidente Repúblika mak estabelese sentru votasaun paralelu tanba ho razaun propagasaun surtu COVID-19.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here