Formasaun ba juventude ne'ebé Knua Juventude Fila-liman (KJF). Imajen Tatoli/José Belarmino de Sá

DILI, 01 jullu 2021 (TATOLI)–Organizasaun Knua Juventude Fila-liman (KJF) ne’ebé apoiu hosi UNDP (United Nations Development Programe) hahú hosi 2017-2020 fó formasaun ba juventude hamutuk 480 iha pilár estádiu nasionál ho negósiu.

Hosi númeru ne’ebé  iha juventude hamutuk 400 mak tuir formasaun ba negósiu no na’in-80 tuir formasaun iha pilár estájiu nasionál.

Hosi númeru benefisiáriu ba atividade ne’e iha pilár negósiu nian hamutuk ema na’in-70 mak konsege hala’o ona sira-nia investimentu mesak no hetan finanseiru hosi UNDP.

Hosi na’in 80 tuir formasaun ba estájiu nasionál no na’in 40 de’it mak daudauk ne’e hala’o hela atividade estájiu iha ministériu sira hanesan, Ministériu Turizmu, Komérsiu no Indústria (MTCI), Ministériu Finansas (MF) no seluk tan no hetan insentivu hosi UNDP.

Jerente SEEWAY UNDP iha organizasaun KJF, Francelino Guterres hateten, organizasaun ne’e harii iha 2017 lansa hosi Primeiru-Ministru (PM) Rui Maria de Araujo, ho nia objetivu atu apoiu kria kampu traballu ba foin-sa’e sira.

“Programa ne’e ita dezeña hosi UNDP no iha kolaborasaun ho ministériu lubuk ida hanesan MTCI, SEFOPE no ministériu relevante seluk,” Francelino Guterres hateten ba Agéncia Tatoli iha edifísiu KJF, Pateo, Dili, kinta ne’e.

Nia dehan, kada tinan UNDP apoiu orsamentu $600.000 hodi realiza programa sira KJF.

Nilvania Fernandes hanesan partisipante iha programa estájiu nasionál ne’ebé KJF realiza hatete, bainhira tuir formasaun ne’e  bele hetan material ne’ebé di’ak hodi aumenta koñesimentu no esperiénsia.

“Ami mai tuir formasaun iha ne’e sira fó matéria oinsá ami bele ba hala’o ami-nia estájiu iha instituisaun relevante sira no oinsá atu hatudu ami nia étika no abilidade utiliza komputadór no seluk-seluk tan,” Nilvania hateten.

Nilvania remata nia ensinu universidade iha Universidade da Paz (UNPAZ) iha tinan akadémiku 2018 iha área ekonomia no jestaun.

Jornalista       : Hortencio Sanchez

Editór             : Francisco Simóes

HAKEREK NO HATÁN

Please enter your comment!
Please enter your name here