Ministru Koordenadór Asuntu Ekonómiku, Joaquim Amaral, fó pose ba Presidente CLN foun, Jervazio Cardoso Jesus da Silva, iha salaun IADE, Bebora, Dili, kinta (01/07). Imajen TATOLI/Egas Cristóvão

DILI, 01 jullu 2021 (TATOLI)–Ministru Koodenadór Asuntu Ekonómiku (MKAE), Joaquim Amaral, fó pose ba Prezidente  Sentru Lojístika Nasionál (CLN, sigla Portugés) foun, Jervazio Cardoso Jesus da Silva, ba períodu 2021 to’o 2025, hodi troka Augostu Juniór Trindade.

“Ita asiste eventu pose Prezidente CLN foun, mudansa sira ne’e prosesu normál iha insituisaun Estadu no la’ós tanba Prezidente CLN sesante komete krime mak sai hosi nia posizaun,” Ministru Joaquim, hateten, iha seremónia pose Prezidente CLN foun, iha sala IADE, Bebora, Dili, kinta ne’e.

Ministru Koordenadór Asuntu Ekonómiku, Joaquim Amaral, fó pose ba Presidente CLN foun, Jervazio Cardoso Jesus da Silva, iha salaun IADE, Bebora, Dili, kinta (01/07). Imajen TATOLI/Egas Cristóvão

Governante ne’e kongratula Prezidente foun tanba aseita konvite lidera instituisaun Estadu hanesan CLN atu garante stock ai-han no halo intervensaun merkadu hodi normaliza folin iha merkadu ho esesível ba sidadaun sira.

“Ha’u agradese ba Prezidente sesante tanba durante tinan-ida resin bele koopera Estadu no povu liuhosi intervesaun merkadu no  garante stock iha armazen sira,” nia akresenta.

Ministru konsidera, Prezidente CLN sesante nia mandatu servisu ho didikativu no resposabilidade tebes, maski iha situasaun defísil iha ámbitu pandemia COVID-19.

Nune’e, governante ne’e husu ba Prezidente foun atu kontinua garante stock ai-han  no jere armazen sira ne’ebé konstrui ona liuhosi kooperasaun Japan International Cooperation Agency (JICA).

“Ita sei hadi’a aspetu legál atu fó kompeténsia ba CLN kontinua programa importante sira ne’ebé Prezidente sesante halo ona ho orsamentu 2021 hamutuk ho funsionáriu sira atu kumpre ezekusaun,” nia afirma.

Iha biban hanesan, Prezidente CLN foun, Jervazio Cardoso Jesus da Silva, agradese ba konfiasa ne’ebé MKAE fó no prontu atu asume kargu ho responsabilidade.

Presidente CLN foun, Jervazio Cardoso Jesus da Silva. Imajen TATOLI/Egas Cristóvão

“Ha’u hanesan ema foun maibé nu’udar timor-oan, ha’u prontu atu serbí ho respsabilidade no lealidade ba superór liuliu loke komunikasaun di’ak hodi garante CLN sai instituisaun ne’ebé garante stock ai-han no halo intervesaun merkadu,” Prezidente  emposadu agradese.

Biban ne’e, nia promete sei kontinua programa sira ne’ebé halo ona hosi Prezidente sesante hodi mellora atendimentu ba sidadaun sira.

“Ha’u hanoin servisu ne’e todan boot, maibé ha’u fiar ita serbisu hamutuk ho Prezidente sesante no funsionáriu tomak ho apoiu hosi ezekutivu sira hodi lori instituisaun ba oin,” nia otimista.

Nune’e mós, Prezidente CLN sesante, Augusto Junior Trindade, agaradese ba konfiasa ne’ebé Governu fó hodi durante mandatu, realiza ona programa prioridade balun hanesan garante stock ai-han, konstrui armazen iha Baucau no Bobonaro liuhosi kooperasaun JICA.

“Ha’u simu karta ezonerasaun, maibé nu’udar timor-oan ha’u kumpre no hakruuk tebes ba desizaun ne’e. Ha’u mós agradese no hakarak kontinua koopera ho Prezidente CLN foun iha momentu saida de’it bainhira husu apoiu,” nia promete.

Prezidente CLN sesante, Augusto Junior Trindade. Imajen TATOLI/Egas Cristóvão

Augusto Junior agradese ba profisionalizmu no desizaun MKAE ne’ebé nia konsidera balansu tanba durante tinan-ida resin serbisu hamutuk ho di’ak no envolve ba programa distribuisaun Cesta Bázika ho susesu.

“Ha’u-nia parabéns no votu susesu ba ita boot (prezidente foun),” nia felisita.

Prezidente CLN sesante husu ba Prezidente foun atu kontinua akompaña halo pagamentu ba empreza sira ne’ebé partisipa iha programa Cesta Bázika.

“Ha’u husu kontinua koopera ho ita-nia parseiru internasionál sira hanesan JICA no Programa Ai-han Mundiál (WFP, sigla inglés), tanba sira fó apoiu maka’as tebes ba konstrusaun armazen sira,” nia haktuir.

Prezidente CLN simu knaar hosi eis Ministru Turizmu, Komérsiu no Indústria, Antonio da Conceição iha tinan 2018.

Seremónia ne’e partisipa hosi Ministru Turizmu Komérsiu no Indústria, José Lucas do Carmo da Silva, Vise-​Ministru Turizmu, Komérsiu no Indústria, Domingos Lopes Antunes, Diretór sira hosi ministériu relevante no insitituisaun tutela ba MKAE.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here