Primeiru-Ministru, Taur Matan Ruak, prezide reuniaun estraordinária Konsellu Ministru, iha Palásiu Governu, kinta (01/07). Imajen TATOLI/Francisco Sony

DILI, 01 jullu 2021—Governu liuhosi reuniaun Konsellu Ministru (KM) aprova Projetu Rezolusaun Governu, atu mantein impozisaun Serka Sanitária iha munisípiu Baucau no Dili ba loron hitu tan, nune’e hahú ohin to’o 07 jullu.

“Bandu nafatin sirkulasaun ema entre munisípiu Baucau no Dili no sirkunskrisaun administrativa sira seluk, exetu kazu hirak ne’ebé ho fundamentu forte tanba razaun seguransa públika, saúde públika, asisténsia umanitária, manutensaun sistema abastesimentu públiku ka razaun seluk ne’ebé presiza atu hala’o ba interese públiku,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu iha Palásiu Governu, kuarta ne’e.

Notísia relevante: Governu mantein Serka Sanitária Baucau-Dili to’o aban

Portavós Governu esplika, desizaun ne’e la inklui sirkulasaun individuu sira ne’ebé komprova vasinasaun kompleta (doze rua) kontra COVID-19 no mós labarik sira ho idade tinan 6 mai kraik ne’ebé akompaña.

To’o loron 28 juñu 2021, Sala Situasaun, Sentru Integradu Jestaun Krize (CIGC, sigla portugés), rejista kazu pozitivu 20, rekuperadu 57 no kazu ativu 801, ne’ebé antes ne’e iha inísiu fulan-juñu kazu ativu kuaze 2.000 maibé daudaun kada loron númeru kazu ativu tun no númeru rekuperadu sa’e.  

Iha domingu (27/06) ema ho idade 18 ba leten iha territóriu tomak hamutuk 25.421 (3,37%), kompleta ona vasina prevensaun COVID-19 doze daruak, enkuantu ema 193.955 (25,7%) simu ona vasina doze dahuluk.

Jornalista : Antónia Gusmão

Editora     : Julia Chatarina

1 KOMENTÁRIU

  1. Ema balun nebe kompleta ona vacina dala 2 maibe halo viagem ba municipio sra sei presija test swab hnsan municipio lautem. Ne Oinsa? Obrgdo

HAKEREK NO HATÁN

Please enter your comment!
Please enter your name here