Telekomunikasaun uza fibra óptika. Imajen/Espesiál

DILI, 01 jullu 2021 (TATOLI)--Governu liuhosi desizaun Konsellu Ministru (KM) delibera hodi fó autorizazsaun abertura prosedimentu aprovizionamentu konkursu públiku internasionál, hodi sosa no instala ekipamentu kabu submarinu fibra ótika,  hosi sidade Darwin no Port Hedland iha Commonwealth Austrália mai Timor-Leste.

Projetu deliberasaun ne’e, aprezenta hosi Vise-Primeiru-Ministru no Ministru Planu no Ordenamentu, José Maria dos Reis, ne’ebé hanesan mós Prezidente Komisaun Interministeriál ba implementasaun kabu submarinu fibra ótika.

“Ho delibresaun ne’e, hahú konkursu públiku dada kabu submarinu mai Timor-Leste, ne’ebé se obra hotu la’o di’ak ita avansa no finaliza prosesu hirak ne’e dada kabu submarinu  mai no hahú ona,”  Ministru Prezidensia Konsellu Ministru, Fidelis Manuel Leite Magalhães, relata hafoin reuniaun esekutivu, Palásiu Governu, kinta ne’e.

Notísia relevante: Governu prevee millaun $41,5 sosa ekipamentu informátika ba kabu submarinu

Nune’e, Governu esforsu halo projetu ne’e tuir planu bele finaliza iha maiu 2023, maibé depende kalendáriu tanba sei halo estudu lori rejistu préviu ba Tribunál Konta ne’ebé sei han tempu.

“Ita prevee buat hotu la’o di’ak no tuir kalendáriu ne’ebé iha no laiha impedimentu, entaun ita iha espetativa katak maiu 2023 obra ne’e la’o tanba prosesu konkursu sira ne’e sei lori fulan-neen  hafoin  implementasaun obra,” nia akresenta.

Ministru espera ekipa liña ministeriál responsável bele esforsu halo buat hotu tuir planu no kalendáriu ne’ebé iha, nune’e tinan rua ba oin bele iha ligasaun internet di’ak liu iha Timor-Leste.

Projetu fibra ótika sei lori Timor-Leste ba nível di’ak liu asesu informasaun no partisipasaun iha mundu globalizadu.

Governu prevee milaun $41,588 iha verba Fundu Infraestrutura halo akizasaun ekipamentu informátiku kabu submarinu atubele ezekuta projetu iha tinan ne’e.

Polítika dada kabu submarinu hosi Darwin mai Timor-Leste nu’udar prioridade Governu ho kooperasaun Governu Canberra, ho objetivu atu eleva kapasidade rede internet iha rai laran, tanba VIII Governu Konstitusionál iha programa Governu eletróniku (E-Government), ne’ebé bainhira realiza presiza iha liña internet ho lais.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here