Benifisiáriu programa Conta de Bebe 2021 iha Salaun Sentru Quesadhip Ruak Taibesi. Imajen Tatoli/Francisco Sony.

DILI, 01 jullu 2021 (TATOLI)—Fundadora Centro Quesadhip Ruak (CQR), Isabel da Costa Ferreira, hateten bebé na’in-21 mak sai benefisiáriu ba programa “Conta da bebê 2021” hosi Fundasaun Centro Quesadhip Ruak. 

Espoza Primeeiru Ministru Taur Matan Ruak, Isabel da Costa Ferreira, apiu bolseiru Napolião Barros. Imajen Tatoli/Francisco Sony

“Ohin, ita halo lansamentu ba Programa Conta da bebê. Kritériu atu sai benefisiáriu ba programa refere, Fundasaun Quesadhip identifika ema ne’ebé kbiit laek. Nune’e Fundasaun deside no identifika ona bebé hamutuk 21, feto 10 no mane 11 mak sai benefisiáriu ba programa ne’e. Hosi benefisiáriu 21 ne’e kompostu hosi Suku Lahane Orientál Bebe na’in-haat (4), Vila Verde bebé na’in-tolu (3), Mascarenhas na’in-tolu (3), Dare na’in-tolu (3), Comoro na’in-lima (5) no Suku Madohi na’in ida (1),” Fundadora CQR ne’e hateten ba jornalista sira, iha salaun Centro Quesadhip, Taibesse, Dili, kinta ne’e.

Programa Conta da bebê ne’e Fundasaun Quesadhip hala’o hahú iha 2014 hodi rejista bebé na’in-60 ne’ebé kompleta ona on aba tinan neen tanba programa ne’e hah’u hosi labarik moris mai to’o tinan neen (6).

Fundadora ne’e hatete, Centro Quasadhip Ruak sei kontinua ho “Programa ba Futuru” ka Banku Sentrál fó naran “Ha’u-nia Futuru” katak labarik ho família labele foti osan bainhira labarik seidauk kompleta tinan 17.

Programa ne’e Banku Nasionál Komérsiu Timor-Leste (BNCTL) de’it mak halo maibé banku hotu-hotu iha Timor-Leste halo maibé Fundasaun Quesadhip iha programa rua ho nia objetivu hanesan, ida mak “Conta da bebê” no “Ha’u-nia Futuru”.

Bank Mandiri no Sentru Quesadhip Ruak (Taibesi) apoiu nesidade ba beinefisiáriu programa Conta de Bebe 2021, iha Taibesi, kinta (01/07). Imajen Tatoli/Francisco Sony.

“Programa rua ne’e ami hahú ho investimentu diferensa. Conta da bebê ami tau $15 ba fulan ida no $1 ba Ha’u-nia Futuru. Ami hahú tau osan ba labarik tinan lima (5) ka neen (6) ne’ebé asesu ba eskola no ami hatama osan ba konta bankária kada fulan $90, no ami la fó ai-han ona no só apoiu finanseiru ba sira,” nia dehan.

Programa Conta da bebê ne’e nia objetivu atu redusaun ba mortalidade ba labarik nian, tanba Timor-Leste mós iha problema má nutrisaun ne’ebé labarik tinan lima (5) mai kraik mate tan ida-ne’e.

“Tanba ida-ne’e ita halo programa ne’e hodi hahan ba família, hodi hasa’e kresimentu ba labarik atu moris di’ak to’o idade ne’ebé ita hotu dezeja ba eskola,” nia dehan.

Aleinde ne’e, nia hateten ho individu no la’ós lori CQR nia naran hakarak ajuda labarik na’in-haat (4) feto ida (1) no mane tolu (3), tanba ho loron aniversáriu kazamentu ba Fundadora Isabel da Costa Ferreira no Fundadór Maijór Jenerál, Taur Matan Ruak nian, nune’e sira harakak fó prezente ba joven na’in haat ne’e.

“Relasiona ho ami-nia aniversáriu kazamentu mak ami hakarak fó prezente ba ita-nia alin ka joven na’in haat mak ami deside fó bolsu estudu ba sira. Hahú ohin ba oin, ami manda osan ba sira-nia konta bankária kada fulan $50, ne’e ba joven ida eskola iha eskola portugeza no seluk eskola iha semináriu mak fulan ida ita haruka $100,” nia dehan.

Tinan ne’e, Fundasaun Quesadhip sei halo tan levantamentu ba iha Munisípiu Manatuto maibé antes ne’e Quesadhip hala’o ona iha munisípiu lima hanesan Aileu, Liquiça, Manufahi, Ermera no Dili foin lansa.

“Hosi munisípiu haat ne’e ema hamutuk 300-resin mak sai benefisiáriu ba Conta da Bebê,” nia hateten.

Jerente Jerál Bank Mandiri, Danil Morad, apoiu subsidiu ba benifisiáriu programa Conta de Bebe 2021, iha Taibesi, kinta (01/07). Imajen Tatoli/Francisco Sony.

Iha biban hanesan, Jerente Jerál Bank Mandiri, Danil Morad hateten Conta Ha’u-nia Futuru ne’e ho idade 17 mai kraik no konta ne’e nia funan la hanesan ho konta sira seluk, tanba Bank Mandiri fó funan espesiál 1.5% kada tinan ida.

“Osan sira-ne’e foti bainhira labarik sira-ne’e nia tinan 17 maibé hosi 17 mai kraik seidauk bele foti. Maibé, ha’u husu mós ba inan-aman sira atu bele aumenta osan $1 ka $2 ba labarik nia konta bankaria. tanba ida-ne’e di’ak ba labarik nia futuru,” nia dehan.

Entretantu benefisiáriu Francisco Guterres hateten, agradese ba Fundasaun Quesadhip ne’ebé ho laran luak bele apoiu ona bebé sira-ne’ebé mak Fundasaun Quesadhip identifika laiha duni kbiit.

“Ha’u kontente ho programa ida-ne’e. Di’ak liu ita-nia oan nia futuru no programa ne’e sai ezemplu ne’ebé di’ak ba sira seluk, nune’e bele halo tuir programa ne’e ba labarik sira seluk,” nia hateten.

Jornalista :  Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here