Xefe suku Fuat, Martins Pinto, no entidade relevante simu Sekretáriu Estadu Komunikasaun Sosiál, Merício Juvinal dos Reis 'Akara', no komitiva, molok halo diálogu ho komunidade, iha sede suku, kinta (01/07). Imajen TATOLI/Natalino Belo

LAUTÉM, 01 jullu 2021 (TATOLI)–Xefe suku Fuat, Postu admistrativu Iliomar, munisípiu Lautém, Martins Pinto, hateten, autoridade suku, veteranu, inan-aman no juventude iha suku ne’e kontente simu programa Naroman ba Suku tanba liuhosi meiu ida-ne’e bele habelear informasaun entre suku no Governu sentrál.

“Bainhira Sekretaria Estadu Komunikasaun Sosiál (SEKOMS) lansa programa ne’e, ami iha suku Fuat sente hanesan parte ida hosi ukun-an no merese atu simu Naroman ba Suku maski ho kondisaun limitadu iha rekursu, maibé ami prontu simu,” Xefe suku Fuat hateten iha sede suku, kinta ne’e.

Autoridade lokál ne’e haksolok mós ho prezensa membru Governu, institusaun relevante, autoridade munisípiu no lokál iha suku Fuat, maski kondisaun estrada iha postu Iliomar ba suku Fuat seidauk di’ak.

“Ohin loron na’in-ulun sira hakat to’o mai ami-nia le’et, ami sente kontente simu ho liman rua, laran ksolok tebes tamba programa Naroman ba suku implementa iha suku Fuat,” nia akresenta.

Komunidade iha suku Fuat ohin halo diálogu ho Sekretária Estadu Komunikasaun Sosiál, Merício Juvinal dos Reis ‘Akara’, no iha biban ne’e partisipa  mós hosi Vise Ministru Justisa, José Edmundo Caetano, Vise Ministru Agrikultura no Peska, Abílio Xavier de Araújo.

Aleinde ne’e, partisipa mós hosi Prezidente Conselho de Imprensa, Virgílio Guterres, Prezidente Konsellu Diretivu Agência TATOLI, I.P, Manuel Pinto, Admistrador Munisípiu Lautém, Domingos Sávio, Komandante Polísiaunisípiu Lautém, Superintendente, Antonio Rego Fernandes, veteranu, relijioza, estudante inklui komunidade iha suku ne’e.

Suku Fuat kompostu hosi aldeia Acadirulo, Rumutau no Vataomar, ho totál populasaun hamutuk 1.400 resin.

Durante tinan 2019 to’o 2020, SEKOMS konsentra uluk ba suku ualu, ne’ebé suku tolu lokalizadu iha parte leste, hanesan Hae-coni iha postu administrativu Baguia, munisípiu Baucau, suku Muapetine no Lore II iha munisípiu Lautém, parte sul iha suku Liurai, munisípiu Aileu no suku Rotuto, iha munisípiu Manufahi, enkuantu parte oeste iha suku Leo-hitu no Soelesu iha munisípiu Bobonaro no suku Batumanu, postu administrativu Atsabe, munisípiu Ermera.

Enkuantu iha tinan 2021, programa Naroman ba Suku sei implementa tan iha suku haat tuir kapasidade no rekursu ne’ebé SEKOMS iha.

Ba kada suku ne’ebé sai benefisiáriu, SEKOMS fó apoiu orsamentu maizumenus $10.000 liuhosi transferénsia públika, hodi harii Sentru Informasaun ba komunidade no implementa programa Naroman ba Suku.

Programa Naroman ba Suku nu’udar programa pilotu hosi VIII Governu Konstitusionál liuhosi SEKOMS, ho objetivu haat mak hanesan promove asesu ba informasaun iha suku rurál no hakbiit komunidade sira-nia kapasidade asesu ba informasaun.

Programa ne’e buka atu lori informasaun ba nível lokál besik ba komunidade sira iha suku hodi fó dalan ba komunidade atu hato’o sira-nia preokupasaun ka obstákulu sira ne’ebé mak sira hasoru hodi aprezenta ba meiu komunikasaun nasionál sira.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here