Peste Suína Afrikana. Imajen/Olmix

DILI, 30 juñu 2021 (TATOLI)–Diretora Nasionál Veterinaria hosi Ministériu Agrikultura no Peska (MAP), Joanita Jong, informa hahú tinan 2019 to’o 2021, Peste Suína Afrikana (ASF-African Swine Fever) hamate ona fahi hamutuk 100.000 iha territóriu tomak.

“Númeru mortalidade fahi kauza hosi Peste Suína Afrikana, hahú hosi setembru  2019 to’o agora fahi hamutuk 100.000 resin,” Diretora hateten ba Agência TATOLI, iha salaun Tower Fatuhada, kuarta ne’e.

Bainhira vírus ASF mosu iha tinan 2019, fahi hamutuk 50.000 mak mate momentu ne’ebá.

“Munisípiu Bobonaro, Aileu, Ermera no Baucau rejista fahi mate barak liu no munisípiu seluk kona hotu maibé ladún barak inklui iha Dili no Ataúro mós fahi mate ladún barak,” nia akresenta.

Tanba ne’e, MAP kolabora ho Market Development Facility (MDF) halo lansamentu ba kampaña sensisbilizasaun kombate Peste Suína Afrikana no Peste Lakataru Makerek (Fall Armyworm), ne’ebé hala’o iha fulan kotuk hodi kombate peste han komunidade nia batar.

Notísia relevante: MAP-MDF lansa kampaña sensibilizasaun nasionál ba prevensaun peste

“Hafoin halo kampaña kona-ba vírus ne’e ho ninia prevensaun sira, ita kontente tanba kazu Peste Suína Afrikana tun, maski iha munisípiu balun  fahi kontinua mate, maibé la’ós hanesan uluk ona no mate  la’ós tanba Peste Suína Afrikana. Ami-nia tékniku tun direta halo identifikasaun no foti amostra, balun iha hela teste iha laboratóriu, tanba ne’e hafoin rezultadu sai maka ami públika,” Joanita Jong haktuir.

Tuir Dirijente, hafoin halo sensibilizaun, komunidade sira hahú iha konsiénsia hodi sulan no kesi fahi bainhira atu salva hosi moras ne’e.

“Ita nafatin enkoraja komunidade halo tuir protokolu no ba oin ami haree ona programa balun, bainhira hakiak fahi tenke hosi fonte seguru no hakiak iha fatin seguru, nune’e ba oin ita labele hasoru tan problema Peste Suína Afrikana,” nia hatutan.

Jornalista : Natalino Costa

Editora      : Julia Chatarina

HAKEREK NO HATÁN

Please enter your comment!
Please enter your name here