Parlamentu Nasionál (PN) ho Universidade Nasionál Timor Lorosa’e (UNTL) asina prtokolu kooperasaun kontinuasaun. Imajen Tatoli/Evaristo Soares Martins.

DILI, 30 juñu 2021 (TATOLI)—Parlamentu Nasionál (PN) ho Universidade Nasionál Timor Lorosa’e (UNTL) asina prtokolu kooperasaun kontinuasaun iha área tolu kompostu hosi formasaun rekursu umanu, dezenvolvimentu institusionál no peskiza sientífika.

“Asinatura protokolu kooperasaun entre Parlamentu Nasionál ho Universidade Nasionál Timor Lorosa’e, ha’u hanoin ne’e la’ós buat foun tanba estadu tomak hasoru kestaun rekursu umanu, tantu instituisaun polítika no instituisaun Governu ninian. Tanba ne’e investimentu iha rekursu umanu nu’udar investimentu estratéjiku no laiha dalan seluk, estadu tenke assume ida-ne’e,” Prezidente Parlamentu Nasionál ne’e hateten ba jornalista sira hafoin hala’o asinatura protokolu kooperasaun ne’ebé asina hosi Prezidente Parlamentu Nasionál, Deputadu Aniceto Longuinhos Guterres Lopes no Magnífiku Reitór UNTL João Soares Martins, iha sala konferénsia Parlamentu Nasionál, kuarta ne’e.

Objetivu hosi protokolu kooperasaun ne’e inklui konsentimentu mútua no verifikasaun kondisaun apropriada, kualkér programa ba interese ezekutável ne’ebé kontribui no hasa’e dezenvolvimentu relasaun kooperasaun iha área formasaun rekursu umanu, dezenvolvimentu institusionál no peskiza sientífika no protokolu ne’e válidu ba tinan-lima, hahú hosi data asinatura.

Prezidente Parlamentu Nasionál konsidera asinatura protokolu kooperasaun ne’e importante tebes ba dezenvolvimentu rekursu umanu uma fukun nian, liu-liu ba deputadu no funsionáriu sira.

Prezidente Parlamentu Nasionál atuál kontinua asina akordu ne’e tanba selebra ona iha tempu Prezidente Parlamentu Nasionál antiga, Vicente Guterres nian.

Iha Aniceto Guterres nia mandate, iha kompromisu ida atu halo dezenvolvimentu ho másimu iha área rekursu umanu Parlamentu Nasionál nian, tantu deputadu sira, funsionáriu sira no tékniku sira-ne’ebé atu fasilita polítiku sira atu ezerse sira-nia funsaun hanesan lejizladór no fiskalizadór ho di’ak.

Xefe lejizladór ne’e fó-sai katak, sei halo revizaun ba planu estratéjiku dezenvolvimentu Parlamentu Nasionál, nune’e investe maka’as liu iha rekursu umanu, dezenvolvimentu institusionál no peskiza sientífika.

Prezidente Parlamentu Nasionál akresenta ba ekipa UNTL katak uma fukun sei rekruta graduadu sira hosi fakuldade direitu, filozófia no finansa públika hodi reforsa rekursu parlamentu nian.

Entretantu, Magnífiku Reitór UNTL João Soares Martins, hateten akordu protokolu ne’e sei benefísia entre UNTL, PN no partidu polítiku sira.

“Saida de’it mak parlamentu presiza, talves UNTL la ajuda hotu maibé ami sei ajuda iha área balun. Membru parlamentu no funsionáriu sira-ne’ebé iha interese atu kontinua estudu entaun UNTL nakloke, tanba rezultadu hosi UNTL mak eis Prezidente Parlamentu Nasionál atuál Prezidente Repúblika, Francisco Guterres ‘Lú Olo,” nia dehan.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here