Seremónia lansamentu projetu nasionál EIF, iha City 8 Dili, kuarta (30/06). Imajen TATOLI/Francisco Sony

DILI, 30 juñu 2021 (TATOLI)–Ministru Koordenadór Asuntu Ekonomia (MKAE), Joaquim Amaral, no Ministra Negósiu Estranjeiru no Kooperasaun, Adaljiza Albertina Xavier Reis Magno, lansa projetu nasionál Enhanced Integrated Framework (EIF) hodi fó kapasitasaun institusionál ba Grupu Traballu liga ho komérsiu hodi adere ba Organizasaun Mundiál Komérsiu (WTO, sigla Ingles).

“EIF hanesan sekretaridu ida hosi WTO nia mahon iha Jenebra, atu ajuda no kapasita país sira ne’ebé iha prosesu prepara-an tama iha Organizasaun Mundiál Komérsiu. Programa ne’e sei fó treinamentu ba rekursu sira atu prepara materiál di’ak atubele kumpre kalendáriu indikativu ne’ebé Estadu Timor-Leste konkorda ona ho WTO atu sai membru,” Ministru Joaquim hateten hafoin lansa projetu iha City 8, Has-laran-Dili, kuarta ne’e.

Ministru Koordenadór Asuntu Ekonomia (MKAE), Joaquim Amaral. Imajen TATOLI/Francisco Sony

Projetu EIF sei fó kapasitasaun iha área negosiasaun, komérsiu no lejizlasaun atu permite Estadu Timor-Leste liberaliza merkadu globál.

“Ita hatene atu adere ba Asosiasaun Nasaun Sudeste Aziátiku (ASEAN, sigla inglés) iha rekezitu ne’ebé ita presiza kumpre no iha pilár ekonomia ne’ebé ita tenke liberaliza no armoniza lejizlasaun sira ho kuadru rejionál no mundiál,” nia rekoñese.

Iha loron 01 outubru 2020, Timor Leste partisipa ona iha enkontru dahuluk Grupu Traballu ne’ebé estabelese iha loron 07 dezembru 2016.

Grupu Traballu antes ne’e elabora dokumentu kona-ba adezasaun ba WTO ne’ebé hetan ona apresiasaun a’as hosi membru no sekretariadu organizasaun iha jenebra.

“Ita hatene bainhira adere ba organizasaun mundiál ne’e, presiza iha lejizlasaun sira ne’ebé di’ak atu garante estabilidade ba investidór sira halo investimentu ba potensialidade rekursu ne’ebé iha,” nia akresenta.

Estadu Timor-Leste iha interese boot atu sai membru WTO hodi hola parte iha merkadu rejionál no mundiál.

Timor-Leste presiza hadi’a lejizlasaun setór investimentu

Tanba ne’e, EIF sei apoia Timor-Leste atu armoniza lejizlasaun sira, liuliu lei investimentu sira atubele kumpre rekezitu sai membru WTO no ASEAN.

Seremónia lansamentu projetu nasionál EIF, iha City 8 Dili, kuarta (30/06). Imajen TATOLI/Francisco Sony

“Ita tenke hadi’a an tanba ho taxa kiik ona maibé seidauk konsege atrai investidór, entaun ita tenke hadi’a lejizlasaun iha setór investimentu sira hodi hamenus burokrasia ba atedimentu sira no hadi’a atedimentu servisu públiku atu prosesa lisensa atividade negósiu ruma bele han tempu badak ho efikásia no efisiénsia,” Ministru esplika.

Governu Timor-Leste hatama ona planu armonizasaun lejizlasaun sira ho baze pro-setorál atu sai integradu no adapta lejizlasaun iha merkadu globál.

“Lei investimentu tenke garante fó seguransa ba investidór atu seguru no presiza hadi’a lejizlasaun estruturante lubuk ne’ebé liga ba komérsiu atubele oferese ambiente negósiu amigável ho investidór sira,” governane ne’e subliña.

Iha fatin hanesan, Koodenadór ekipa Téknika Timor-Leste ba WTO, Cesar A. Dias Quintas, esplika, EIF hanesan organizasaun multilaterál ne’ebé envolve doadór hosi membru organizasaun atu suporta no kapasita nasaun menus dezenvolvidu hodi sai membru permanente.

“Ita prepara sai membru WTO, entaun sira fó apoiu kapasitasaun institusionál, maibé foku ba komérsiu atu hametin sistema komérsiu integradu iha mundiál hodi prenxe rekezitu, nune’e Timor-Leste tama iha prosesu negosiasaun no halo akordu ho membru sira,” nia dehan.

Nune’e, EIF fó kapasitasaun ba ekipa negosiadór hosi nível ministériu hitu, kompostu hosi ema hamutuk 17 ne’ebé lidera hosi Ministériu Koordenadór Asuntu Ekonómiku (MKAE).

Koodenadór ekipa Téknika Timor-Leste ba WTO, Cesar A. Dias Quintas. Imajen TATOLI/Francisco Sony

“Sekretariadu WTO iha Jenebra konfirma ona katak Timor-Leste hanesan país ne’ebé halo dokumentu ho kualidade liga ho rekezitu sira. Tanba ita hetan hela kapasitasaun no iha kompromisu atu sai membru,” nia informa.

Daudaun ne’e, Governu Timor-Leste hamutuk ho país 22 seluk sai país observadór hodi akompaña prosesu sai membru hanesan ho nasaun 164  sira seluk.

Organizasaun Mundiál Komérsiu nu’udar organizasaun ne’ebé trata regra komérsiu entre nasau,  ho objetivu garante atividade komersiál hotu la’o ho livre.

Jornalista : Florêncio Miranda Ximenes

Editora     : Julia Chatarina  

HAKEREK NO HATÁN

Please enter your comment!
Please enter your name here