ESJ 04 setembru UNAMET, Balide, Dili. Imajen/Dok. Espesiál

DILI, 30 juñu 2021 (TATOLI) –Ministru Edukasaun Juventude no Desportu (MEJD), Armindo Maia, promete sei delega ekipa tékniku hodi halo levantamentu atu oinsá reabilita moru protesaun iha Eskola Sekundáriu Jerál  (ESJ) 04 setembru UNAMET, Balide, Dili.

Notísia Relevante : Eskola ESG 4 Setembru UNAMET Vensedór “JOPAR”

“Ha’u simu ona ita boot sira nia difikuldade no preokupasaun. Ha’u sei haruka ekipa ida sei tun fali mai atu haree uluk kondisaun eskola nian depois maka ita sei deside buat ruma,” Ministru Armindo Maia, hateten hodi responde preokupasaun Diretór Eskola ESJ 04 setembru UNAMET, Sergio de Jesus, ne’ebé husu atu MEJD tau atensaun hodi reabilita moru protesaun eskola nian.

Ministru Armindo Maia, husu mós ba dirijente eskola nian atu mellora liután jestaun eskola nian, no jere orsamentu konsesaun eskolár ho didi’ak atu halo netik buat ruma ba eskola.

Nia informa, ESJ 04 setembru UNAMET mós tama ona planu kandidatu ba eskola referénsia tanba ne’e parte eskola tenke prepara kondisaun atu utiliza sistema iha eskola ne’e ho didi’ak hodi bele ajuda Governu atu garante ninia apoiu mai eskola ne’e.

Molok ne’e, diretór Eskola ESJ 04 setembru UNAMET, Sergio de Jesus,  sira-nia eskola presiza liu maka Governu tenke hadi’a moru iha eskola ne’e atu evita movimentu komunidade nian tama-sai arredores eskola.

“Ha’u husu Governu bele ajuda rezolve situasaun ne’ebé ami hasoru. Ami husu de’it Ministériu bele apoiu ekipamentu ruma atu ami bele hadi’a tiha moru eskola nian tanba eskola ne’e sai fali fatin lixu ba animal no ema nian,” nia hateten ba Agência Tatoli iha nia serbisu fatin, kuarta ne’e.

Nia afirma katak arredores eskola kotuk iha komunidade lubuk ida mak hela iha ne’ebá, parte eskola hakarak asegura kondisaun eskola ne’e hodi halo netik moru atu bele muda ambiente  eskola ne’e sai eskola verde.

 Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here