Newcastle disease (peste ba manu). Imajen/bostanji

DILI, 30  juñu 2021 (TATOLI)—Diresaun Nasionál Veterinaria hosi Ministériu Agrikultura no Peska (MAP) halo preparasaun atu fó vasina ba manu no karau hodi prevene peste ne’ebé bele hamate animál hirak ne’e.

“Ami nafatin hala’o programa tratamentu ba animál hotu iha territóriu laran tomak, agora ita halo preparasaun ba programa vasinasaun karau no manu,” Diretora Nasionál Veterinaria, Joanita Jong, informa iha salaun Tower, Fatuhada, kuarta ne’e.

Dirijente ne’e konsidera, vasina prevensaun importante tanba daudaun eziste vírus hanaran Newcastle disease (peste ba manu), ne’ebé hamate manu lokál barak.

“Ita iha programa vasinasaun regulár kada tinan dala-tolu,  iha fulan-marsu,  jullu no novembru, tanba ne’e dalan úniku halo prevensaun moras ne’e, tanba ne’e ami kontinia fó asisténsia,” nia akresenta.

Aleinde ne’e, parte diresaun fó mós vasina prevensaun ba peste karau, nune’e labele to’o mate.

“Ami kontinua nafatin  halo programa vasinasaun ba karau, liu-liu ba peste Hemorrhagic Septicemia (peste karau), ne’ebé halo karau kakorok kleuk, kaben sulin, nakoron no bainhira nia la’o iha loron manas nia sente kolen lalais inklui hatún ninia sistema imunidade hodi kona peste ne’e. Tanba ne’e, dalaruma iha Timor-Leste karau barak kesi iha fatin hotu no dalan úniku tenke liu vasina,” nia hatutan.

Maski iha situasaun COVID-19, maibé parte diresaun hamutuk ho kompañia manán konkursu konsege importa aimoruk vasinasaun karau mai Timor-Leste.

“Ita agora distribui bá munísipiu no sira daudaun halo  hela preparasaun vasina iha kampu,” nia tenik.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here