Diretór Ezekutivu Asian Justice and Rights (AJAR), José Luis Oliveira. Imajen Tatoli/Francisco Sony

DILI, 30 juñu 2021 (TATOLI)-Asian Justice and Rights (AJAR) husu ba Estadu Timor-Leste atu la bele extende hela de’it situasaun Estadu Emerjénsia (EE),  maibé halo peskiza didi’ak ba pandemia COVID-19 hodi buka nia solusaun no haforsa serbisu metigasaun COVID-19.

Diretór AJAR José Luis Oliveira, observa katak Sentru Integradu Jestaun Krize (SIJK) iha fugura kompetente no matenek barak,  tanba ne’e buka halo peskiza didi’ak ba moras COVID-19 ne’e, no karik moras ne’e labele lakon entaun tenke buka meiu ne’ebé bele moris ho situasaun COVID-19, maibé la bele prejudika nasaun nia dezenvolvimentu.

Ba Agência Tatoli iha nia knaar fatin Faról, Dili, kuarta ne’e, José Luis Guterres, hateten durante situasaun COVID-19 kontribuisaun ka esforsu ne’ebé AJAR maka halo advokasia liuhosi kestiona polítika sira-nia neon atu haree situasaun ne’e ho rasionál.

Tuir AJAR nia espetativa saúde públika iha Timor-Leste relasiona ho COVID-19 ne’e, servisu ba atendimentu saúde nian ne’e diskriminativu, tanba Governu fó atensaun de’it ba COVID-19, maibé prevensaun ba moras seluk atendimentu menus loos.

“Sitasaun agora loloos ne’e Governu labele haree de’it ba COVID-19, maibé haree mós ba moras seluk hanesan moras fuan, denge, malaria, ema agora mate ne’e la’ós tanba de’it ba COVID-19 maibé tanba mós moras seluk,” José Luis Oliveira hateten.

Durante situasaun COVID-19, serka sanitária no konfinamentu obrigatóriu, difikulta  AJAR atu hala’o atividade ba to’o munisípiu.

Programa sira ne’ebé durante AJAR hala’o iha situasaun COVID-19 ne’e hamutuk haat mak hanesan, Hametin kapasidade organizasaun sosiedade sivíl atu kombate violénsia hasoru feto, ida ne’e la’o, eskola ativista fó formasaun ba joven-sira prepara sira sai ativista futuru, Hametin kapasidade ekonomia feto vítima sira, projetu pilotu atu dezenvolve reparasaun komunitáriu.

“Hosi programa ne’e, rua la’o no rua la la’o tanba serka sanitária no konfinamentu obrigatóriu,” José Luis Oliveira tenik.

Jornalista       : Arminda Fonseca

Editór             : Francisco Simões 

HAKEREK NO HATÁN

Please enter your comment!
Please enter your name here