Diretór Alfándega Munisípiu Covalima, Nuno Nogueira. Imajen Tatoli/Celestina Teles

COVALIMA, 30 juñu 2021 (TATOLI) – Kompañia lokál Mandarin iha Munisípiu Covalima esporta kami tonelada 236 ba Indonézia liuhosi Postu Fronteira Integradu Tilomar, Salele, Covalima.

“Ita-nia emprezáriu lokál ne’e hasai karta lisensa hosi Agrikultura Munisipiu Covalima atu halo  esportasaun kami ba Indonéziu,” Diretór Alfándega Munisípiu Covalima, Nuno Nogueira, informa ba jornalista iha Covalima, kuarta ne’e.

Diretór Alfándega Munisípiu Covalima, Nuno Nogueira, agradese ba kompañia lokál Mandarin tanba kontribui esporta kami tonelada 236 ba Indonézia liuhosi Fronteira Postu Integradu Tilomar, Salele.

Kompañia Mandarin esporta kami ne’e hahú iha fevreiru to’o juñu, tanba sira prienxe kritéria hosi Alfándega hodi hasai rezultadu teste swab hosi Ministériu Saúde hafoin Alfándega aprova pedidu esportasaun.

Kontribui reseita $62.882,21 ba kofre Estadu

Biban ne’e, Diretór Alfándega Munisípiu Covalima, Nuno Nogueira, informa durante janeiru to’o juñu ne’e, kontribui ona reseita ba kofre Estadu ho montante $62.882,21.

“Taxa sira-ne’e ita rekolla  mai hosi importasaun no balun fó sansaun no penalidade ba ita-nia emprezáriu sira ne’ebé mak hatama importasaun,” Nuno Nogueira  hateten.

Molok atu implementa taxa, Alfándega fó avizu ba emprezáriu-sira tenke onestu hodi informa presu sasán ba Alfándega ne’ebé ho loloos.

Jornalista       : Celestina Teles 

Editór             : Francisco Simões

HAKEREK NO HATÁN

Please enter your comment!
Please enter your name here