Diakusaun meza redonda INCT, iha salaun Tower, Fatuhada, kuarta (30/06). Imajen/INCT

DILI, 30 juñu 2021 (TATOLI)–Instititu Nasionál Siénsia no Teknolojia (INCT, sigla portugés) halo diskusaun meza redonda hodi tau hanoin hamutuk buka solusaun ba efeitu atividade ekonómika durante implementasaun Serka Sanitária liga ho COVID-19.

“Ami halo diskusaun kona-ba impaktu krize ekonómiku ne’ebé afeta hosi COVID-19  durante kuaze tinan-rua nia laran, setór ekonómiku formál no informál  barak maka paralizadu no afeta taxa dezempregu sa’e, nune’e influénsia ba kapasidade kompra no produsaun rai-laran menus tanba labele halo movimentasaun tun sa’e,” Prezidente Konsellu Ezekutivu INCT, José Cornélio Gueterres, informa iha salaun Tower Fatuhada, kuarta ne’e.

Iha fatin hanesan, Xefe Gabinete Primeiru-Ministru Azevedo Marçal, hateten durante tinan-rua ona Timor-Leste enfrenta situasaun polítika no COVID-19 no ikus liu mosu dezastre naturál iha abríl liubá.

“Haree ba situsaun ne’e, iha tinan 2020 to’o 2021, Governu halo esforsu fó subsídiu uma-kain 334.000, ne’ebé kada uma-kain hetan $200, iha mós moratóriu kréditu ho juru 50%, ho benefisiáriu 10.000 resin no medida seluk tan,” nia dehan.

Aleinde ne’e, Governu tau fundu oituan atu fó apoiu ba trabalaladór sira no ikus liu maka apoia programa Cesta Bázika ne’ebé hanesan intervensaun atu ajuda populasaun hodi hakma’an no labele fó impaktu maka’as hosi situasaun COVID-19.

Antes ne’e, aprovasaun Orsamentu Retifikativu 2021, halo mós mudansa ba dotasaun Fundu COVID-19, ne’ebé ho montante inisiál $31.000.000 hetan ona reforsu $256.641.793, nune’e ninia totál hamutuk $287.641.793.

Nune’e, fó biban ba Governu hodi finansia medida sosio-ekonómiku hanesan apoiu ba empregu millaun $45,3, moratória kréditu millaun $2, izensaun pagamentu propina ba estudante ensinu superiór millaun $14, subsídiu internet ba estudante ensinu superiór millaun $2,2, sosa produtu alimentár hosi produtór lokál millaun $12.

Nune’e mós, subsídiu ba eletrisidade, finansia operasaun Sala Situasaun, Sentru Integradu Jestaun Krize (CIGC, sigla portugés) millaun $16,7, finansia suplementu remuneratóriu ba traballadór liña frente millaun $51,9, no konklui pagamentu ba programa Cesta Bázika millaun $31.

Enkuantu, ba distribuisaun Cesta Bázika, Governu liuhosi ministériu implementadór kontinua nafatin atividade, ho kondisaun nafatin kumpre protokolu saúde hosi Organizasaun Mundiál Saúde no Ministériu Saúde.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here