Sunu-lilin fó hanoin ba ema ne'ebé lakon ona vida tanba virus HIV-SIDA, no agradese ba sira ne'ebé luta hasoru HIV-SIDA. Imajen Tatoli/Arminda Fonseca

DILI, 30 juñu 2021 (TATOLI)- Estrela+ Timor-Leste, kuarta ne’e, hamutuk ho parseiru sira halo serimónia sunu-lilin ho atu fó hanoin ba ema ne’ebé lakon ona vida tanba virus HIV-SIDA, no agradese ba sira ne’ebé luta hasoru HIV-SIDA.

Notísia Relevante : Governu define forma jurídika Komisaun Nasionál Kombate HIV-SIDA

Prezidente Organizasaun Estrela+ Timor-Leste, Mario Amaral de Oliveira, hateten serimónia sunu-lilin ne’e kada tinan Estrela+ sempre halo no tinan ida ne’e komemora ho tema “Ita Hanoin, Ita Foti Asaun No Ita Tenke Livre Hosi HIV” ho objetivu fanu sira oinsá foti asaun ida ne’ebé atu bele kombate virus HIV-SIDA iha Timor-Leste.

“Serimónia ne’e atu ita hanoin sira ne’ebé lakon vida ona tanba virus HIV-SIDA, no fó agradesimentu ba sira hotu ne’ebé kontribui luta hasoru HIV-SIDA, nune’e kontente ho sira ne’ebé sei hamutuk ho ita maibé ho HIV-SIDA, entaun asaun ne’ebé ita foti mak oinsá hakbesik ba komunidade sosializa informasaun lori maluk sira ne’ebé afetadu ba HIV-SIDA nune’e bele elimina moras ida ne’e iha ita-nia rai,” Mario Amaral de Oliveira, hateten ba jornalista-sira iha Salaun HAK, Faról, Dili, kuarta ne’e.

Atividade ne’ebé durante Estrela+ Timor-Leste halo mak enkoraja maluk sira ne’ebé moris ona ho virus HIV-SIDA oinsá hakbesik an ba Sentru Saúde sira hasai raan hodi bele hatene livre hosi HIV-SIDA ka lae.

“Liuhosi eventu ida-ne’e ita fó hanoin ba malu liuliu pesoál servisu HIV-SIDA ne’ebé durante hala’o servisu iha terrenu katak servisu ida-ne’e todan la’ós fasil, maibé ita tenke fó onra ba malu katak tenke servisu ho fuan tanba servisu ida todan, maibé salva ema-nia vida, signifika salva nasaun,” nia hateten.

Ministériu Saúde liuhosi Jerente programa HIV-SIDA, Bernardo da Cruz, hateten durante sira servisu hamutuk ho Organizasaun Estrela+ halo rejistu ema ne’ebé pozitivu ba HIV-SIDA ne’e hahú hosi 2003 mai to’o 2021 hamutuk 1.374. hosi númeru ne’e agora ativu halo tratamentu ne’e hamutuk 656 no  mate hamutuk 239.

Nia hatutan, ba sira ne’ebé pozitivu ba HIV-SIDA maibé lakohi hatudu-an ka la halo tratamentu polítika ne’ebé Ministériu Saúde halo mak, Ministériu Saúde halo parseiru ho NGO lokál sira ne’ebé servisu duni ba HIV-SIDA nian hanesan, Estrela+, Klínika Bairru-Pité no sira seluk, entaun pesoál servisu sira tun nafatin ba terrenu buka tuir sira ne’ebé pozitivu ne’e halo tratamentu.

Nia hatutan, programa HIV-SIDA Ministériu Saúde hetan fundu Country Coordinating Mechanism (CCM) Timor-Leste hamutuk $3.900.543 ba 2021 to’o 2023 nian, hosi orsamentu ne’e atinje ona 80%, atu haree oinsá garante katak ai-moruk iha nafatin ba maluk sira ne’ebé pozitivu ba HIV-SIDA, hola materiál teste HIV-SIDA nian, selu pesoál sira ne’ebé servisu ba HIV-SIDA, no halo treinamentu hasa’e kapasidade timor-oan sira nian atu presta servisu fasilidade Saúde sira ne’ebé iha.

Koordenadór, Gabinete de Apoiu Sosiedade Sivíl, Filipe da Costa hateten, GASC nia prezensa iha serimónia Estela+  tanba GASC servisu hamutuk ho organizasaun sosiedade sivíl sira iha Timor laran tomak, entaun ohin ne’e Estrela+ hanesan organizasaun sosiedade sivíl ne’ebé tau matan ba maluk sira ne’ebé hetan virus HIV-SIDA halo eventu ida hodi relembra fali maluk sira ne’ebé mate ona tanba virus HIV-SIDA.

“Ha’u mai fó korajen nafatin ba sira katak moras HIV-SIDA, ne’e la’ós moras, maibé nia virus ne’ebé halo ita nia sistema ne’e fraku, hodi halakon ita-nia vida,” nia tenik.

Nia husu ba membru Estrela+, katak servisu atu kombate virus HIV-SIDA ne’e todan, maibé tenke servisu ho pasiénsia tanba misaun ne’ebé atu salva ema ne’e hanesan osan-mean.

Parseiru sira ne’ebé partisipa serimónia sunu lilin mak hanesan, Ministériu Saúde, Gabinete de Apoiu Sosiedade Sivíl, Global Fun, Ospitál Nasionál Guido Valadares (HNGV), Klínika Bairru-Pité, no membru Estrela+ ne’ebé durante ne’e servisu ba iha terrenu kombate HIV-SIDA.

Jornalista : Arminda Fonseca

Editór       : Francisco Simões

HAKEREK NO HATÁN

Please enter your comment!
Please enter your name here