TDD. Imajen Tatoli /Dok

DILI, 30 juñu 2021 (TATOLI)—Tribunál Distritál Dili (TDD), hala’o julgamentu ba kazu administrasaun danoza no pekulatu ne’ebé deskonfia komete hosi arguida-arguidu BS ho ZAZ nu’udár funsionáriu públiku hosi Ministériu Finansa (MF).

Faktu akuzasaun hosi Ministériu Públiku (MP), ne’ebé Tribunál lee-sai, iha indísiu katak, arguida BS nu’udar funsionáriu públiku no hanesan mós eis Xefe Gabinete Ministra Finansa (MF), Santina Cardoso no eis Ministru MF, Rui Gomes ho saláriu mensál $1.125.

Notísia relevante:TDD julga kazu administrasaun danoza no pekulatu hosi MAP  

Alende ne’e, rguidu ZAS nu’udár mós funsionáriu públiku, hanesan tezoreiru ho saláriu mensál $280.

Iha 06 jullu 2018, Ministru Negósiu Estranjeiru no Kooperasaun (MNEK), Dionísio Babo Soares, hato’o pedidu extraordináriu empréstimu  $5.000, konsidera hanesan enviadu extraordináriu atu hala’o viajen ba Cabo-Verde.

Iha 31 agostu 2018, ofisiál finansa ho inisiál LCDC, prepara dokumentu commitment and payment voucher (CPV#:000000000256306) ho montante $195.000, ‘adiantamento para  responder a situasaun urgente enfrentado pelo orgão do Estado afim de esperar  a promulgação do OGE 2018’ autoriza hosi Antónia Suryany, sertifika hosi Jona B. Moniz no aprova  hosi Martinho Lopes.

Iha 10 setembru 2018, gabinete MNEK, devolve osan ne’ebé antes ne’e halo empréstimu ho montante $5.000, maibé arguida la depozita fila-fali ba kofre Estadu hodi utiliza ba interese privadu durante hala’o férias ho família ba iha Bali-Indonézia.

Iha 11 setembru 2018, arguidu ZAS, hanesan tezoreiru ba iha Banku Sentrál Timor-Leste (BCTL sígla portugés)  halo levantamentu osan ba adiantamentu hosi Ministériu Finansa ho montante $195.000.

Osan ne’ebé mensiona, aguarda ka rai iha kofre xave ne’ebé kontrola hosi arguidu nia pose hanesan tezoreiru.

Iha loron no fulan la apuradu iha 2018, arguida BS utitiliza nia kargu hanesan Xefe Gabinete fó orientasaun verbalmente  pedidu empréstimu osan adiantamentu ho naran gabinete Primeiru Ministru ho montante $6.000, MNEK ho montante $1.500, Prezidénsia Konsellu Ministru montante $3.000 no Gabinete  Ministra Finansa ho montante $1.000 no osan $711  ba viajen Singapura, ba iha Diretór Jerál, Xefe Unidade  Finansa Diresaun Jerál Serbisu Korporativu hosi MF rasik.

Maibé, realidade intituisaun estatál  mensiona iha leten la husu pedidu eskrita ba orsamentu empréstimu adiatamentu  ba iha Ministériu Finansa.

Arguida BS aproveita nia kargu no lori naran instituisaun sira-seluk  fó órden verbalmente ba tezoreiru atu foti osan adiantamentu  ho objetivu  atu utiliza ba intesere privadu  ho osan Estadu montante $17.211.

Tuir lei ezekusaun Orsamentu Jerál Estadu (OJE), osan bele devolve hosi tesouru Estadu iha dezembru 2018, maibé arguida BS la halo.

Arguida durante iha prosesu investigasaun hahú mak devolve fazeadamente ho montante osan ne’ebé iha hanesan, primeira faze iha 28 marsu 2019 ho montante $2.000, segunda faze iha 21 outubru 2019 hamutuk $4.211, terseira faze iha 24 outubru 2019 ho montante $3.000 no ikus-liu iha 08 novembru  2019  ho montante $8.000.

Arguidu ZAS, hanesn tezoreiru hatene klaru labele fó osan ba arguida BS bainhira nia pedidu liuhosi verbal no laiha eskrita hosi Ministéiru sira-seluk  kona-bá pedidu empréstimu osan adiantamentu.

Arguidu ZAS, aliende la kuidadu osan no pagamentu ba arguida  BS no mós laiha kontrolu no jestaun  pagamentu sira-seluk ba osan adiantamentu.

Arguidu ZAS mós halo intrinjidu intensionalmente iha dezenpeñu ninia funsaun, la kontrola osan adiantamentu adekuadu ne’ebé kauza halo lakon montante osan ho valor $27.202, ne’ebé laiha justifikasaun  ba ninia utilizasaun.

Arguidu ZAS to’o agora seida’uk devolve montante osan ne’ebé temi ba fali BCTL.

Arguida BS hatene laiha kompeténsia legál atu fó instrusaun verbál ba adiantamentu osan, lori instituisaun  Estadu, hatene mós labele utiliza  ba interese privadu.

Nia mós hatene viola hela forma refere haluha tiha dever funsionáriu, ne’ebé prezudika Estadu  ba benefisiáriu própriu, ba hahalok ne’e bandu no kontra lei maibé halo nafatin hodi ho forma livre  deliberadu konsentimentu.

Ekuantu arguidu ZAS, hanesan tezoreiru, la verifika kualkér pedidu adiantamentu hosi instituisaun-sira seluk la asume funsaun hanesan superviziona ba jestaun  kontrola osan adiantamentu, relasiona ho pagamentu, ne’ebé atua violasaun grave devér inerente  hanesan tezoreiru ba interese pesoál, ho konsekuénsia direta Estadu sofre prezuizu globál ho montante  $27.202.

Ho nune’e, arguida BS rekopera ona  totál osan ne’ebé antes ne’e utiliza konsidera hanesan sirkunstánsia atenuante  extraordináriu iha artigu 56 númeru 2  alinea C  kódigu penál.

Ministéiru Públiku (MP) akuza arguida hanesan autór materiál  forma konsumada  ba krime  pekulatu previstu iha artigu 295 númeru 3 iha kódigu penál, no arguidu akuza ho krime administrasaun danoza previstu iha artigu 274 númeru 2  KP.

Liu hosi audénsia julgamentu, hatán ba akuzasaun sira-ne’e, arguida BS konfesa ho parsialmente ba Tribunál katak, faktu sira ne’e loos hotu kedan tanba momentu ne’ebá ho nesesidade família  nune’e utiliza tiha osan Estadu ne’e hodi lori oan ida moras defisiénsia ba halo tratamentu iha Bali.

Nia konfirma, kona-bá faktu akuzasaun montante osan $711  ba viajen Singapura, nia parte mak halo duni dezlokasaun tanba hetan konvite atu ba tuir reuniaun ida reprezenta Ministéiru Finansa ne’ebé hetan delegasaun hosi membru Governu tutela, maibé la’ós ba iha Diretór Jerál, Xefe Unidade Finansa Diresaun Jerál Serbisu Korporativu hosi MF rasik mak ba.

“Ha’u  agora hetan suspensaun nu’udár funsionáriu hosi Komisaun Funsaun Públika ba tinan rua, nune’e arrepende ho hahalok ne’ebé  kontra lei no promete sei la  halo tan,’’ arguida deklara  iha sala audiénsia TDD.

Nune’e mós arguidu ZAS, hateten nia parte ba foti adiantamentu osan iha banku bazeia ba orientasaun verbál de’it  hosi   Diretór Jerál  no entrega mós osan  ba arguida BS.

Nia parte nu’udár funsionáriu públiku iha MF hanesan tezoreiru hahú iha 31 outubru 2017  no  momentu ne’e simu mós xave ida kofre branka nian, maibé tuir nia hatene iha xave branka ne’e iha rua.

Tanba, antes ne’e iha 2017 bainhira hala’o hela viajen serbisu nian ba iha Maliana, dirijente ida iha diresaun unidade finansa diresaun jerál serbisu korporativu  MF, kontaktu ba nia atu foti osan utiliza ba atividade  serbisu balun, maibé arguidu labele atende tanba halo viajen hela no lori ho xave branka.

Nune’e arguidu husu dirijente ne’e atu empresta lai osan iha diresaun seluk bainhira fila-fali ba Dili mak reenvolsa.

“Maibé hafoin fila mai Dili bainhira ha’u konfirma maluk balun hanesan funsionáriu-hotu  iha diresaun  katak, dirijente ne’e foti tiha ona osan iha kofre branka ne’ebé iha mós xave ida ketak,’’ nia dehan.

Hafoin ne’e, nia parte fó hatene ba Diretór Jerál  momentu ne’ebá kona-bá xave duplikadu maibé la fó orientasaun atu troka.

Tanba ne’e, nia dehan, kona-bá osan rihun $27-resin lakon la’ós iha tempu ne’ebá no foin akontese iha 2018, konsidera falta kontrola.

“Normalmente pedidu sira ne’ebé atu foti osan iha kofre branka bainhira simu orientasaun verbál hosi Diretór Jerál tutela ba diresaun hodi foti no iha lista resibu no  ha’u  rekoñese la sura tuir montante hira mak hela iha branka laran. Tanba ne’e, nu’udár falta kontrolu hosi ha’u rasik nu’udár tezoreiru, maibé atu dehan de’it ho fuan no laran ha’u  nunka foti osan sentavu ida hosi osan rihun $27- resin ne’ebé lakon iha Gabiente no ha’u la deskonfia ema seluk karik ne’ebé ka’er mós xave kofre branka mak foti,’’ arguidu ZAS hateten.

Iha audiénsia, Ministériu Públiku husu mós  Tribunál atu bele halo pedidu rekerimentu  fila-fali ba MP atu loke mós prosesu investigasaun ketak, ba pesoál balun tan, tanba faktu balun arguidu ZAS  fó ona bele identifika tan suspeitu balun ne’ebé sai pontensiál iha prosesu kazu ne’e.

Hafoin rona tiha deklarasaun arguidu sira-nian, Tribunál suspende fila-fali julgamentu ne’e hodi adia ba loron seluk rona sasin sira seluk.

Audiénsia julgamentu ne’e prezide hosi Juiz Alabro, José Gonçalves, Argentinho Neves no MP reprezenta hosi prokuradór Adérito Tilman no arguida ho arguidu hetan asisténsia legál hosi defensór públiku Nelson Borges.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here