Defensor Públiku Jerál, Câncio Xavier. Imajen Tatoli/Nelson de Sousa

DILI, 30 juñu 2021 (TATOLI)—Defensoria Públika preparadu atu deklara riku-soin, tanba instituisaun ne’e simu ona notifikasaun kona-bá prosesu arrolamentu deklarasaun riku-soin no bens interese hosi Komisaun Anti Korrupsaun (CAC sígla portugés).

“Tuir lei foun ne’ebé iha, kargu xefia inklui Defensór Públiku, ho ofisiál justisa nu’udár serbisu iha área krítiku, tenke deklara mós riku-soin. Tanba ne’e, ami simu ona notifikasaun arrolamentu ne’ebé daudaun prepara hela bainrua submete ba CAC,’’ Defensór Públiku Jerál, Câncio Xavier,  hateten ba jornalista Agência Tatoli, kuarta ne’e.

Notísia relevante:Deklara riku-soin, CAC simu ona lista hosi instituisaun hitu

Instituisaun ne’e prontu kolobora, nune’e bainhira arrolamentu remata sei ba deklara riku-soin no bens interese.

Defensoria Públika iha ofisiál justisa na’in 47, Defensór Públiku iha na’in 34 no Defensór Jerál ho adjunta.

Adjuntu Komisáriu CAC ba Asuntu Prevensaun no Sensibilizasaun, Luis Oliveira Sampaio, antes ne’e hateten, to’o 24 juñu, simu ona lista funsionáriu hamutuk 2.383 hosi kargu xefia hahú hosi Diretór  Jerál, Diretór Nasionál to’o Xefe Departamentu hosi instituisaun Estadu hamutuk 28, ba prosesu arrolamentu deklarasaun riku-soin no bens interese.

Antes ne’e mós CAC hasai ona notifikasaun iha nível Ministériu, Sekretária Estadu, Prezidente Autoridade no instituisaun autónoma besik 90 ba prosesu arrolamentu.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here