Imajen/Mídia ZEESM.

OÉ-CUSSE, 30 Juñu 2021 (TATOLI)—Autoridade lokál sub-rejiaun Pante Makasar apoiu autoridade Rejiaun Administrativa Espesiál Oé-Cusse Ambeno (RAEOA) atu kontinua aplika dekretu-lei nú.12/2014, kona-bá retrisaun movimentu tráfiku animál iha área urbana atu garante sidade ne’ebé moos no matak.

Notísia Relevante: Autoridade RAEOA bandu ema labele husik animál iha área urbana

“Nu’udar autoridade lokál sente orgullu tanba hosi operasaun ba animál la’o di’ak, ho nune’e animál mós labele la’o livre ona iha sidade. Komunidade sira komprende ona katak agora autoridade bandu, halo operasaun no implementa selu multa. Tanba, sidade ne’e persiza moos no livre hosi sirkulasaun animál. Ita haree karau teen no foer seluk ladún iha no movimentu transporte mós laiha ona impedimentu hosi animal,” Xefe suku Cunha, Domingos Seco Caunan, informa ba Agência TATOLI, iha sede suku Cunha, sub-rejiaun Pante Makasar, kuarta ne’e.

Entretantu Xefe suku Lalisuk, Ermenegildo Lalisuk, fó sujestaun ba autoridade RAEOA atu kriminaliza sidadaun sira-ne’ebé la kumpre regra hodi husik sira-nia animál la’o livre iha sidade laran.

“Agradese ba autoridade implementa orden operasaun ba animál ne’e, tanba ita hotu-hotu tenke kontribui atu garante sidade ne’ebé moos no matak. Regra ne’e di’ak no ha’u apoiu 100%. Sé mak lakohi koopera, di’akliu kaptura tiha nia animál aplika selu multa no prosesa animál nia na’in, tanba saida mak la kumpre,” Xefe suku Lalisuk hateten.

Iha parte seluk, Xefe suku Costa, Aleixo Abi hateten lei tráfiku animál agora mak foin implementa ho rigorozu no iha mandatu anteriór la implementa, maibé agora ema barak sai sasin ba sidade hahú moos no seguru.

“Ha’u-nia komunidade sira aviza tama-sai bairru atu respeitu dixipliña ba ita-nia dalan públiku sira, animál labele sirkulasaun iha vila laran. Rezultadu ita haree ai-oan sira ne’ebé kuda iha estrada sira vila laran ne’e, hatudu ita kumpre ona regulamentu ne’e. Ne’ebé, ha’u apoiu no apresia. Lei tráfiku animál nia rezulatdu agora ita haree daudaun. Uluk ladún dixiplina tanba regulamentu no sansaun ladún forte,” nia dehan.

Dekretu lei nú.12/2014 kona-bá retrisaun movimentu tráfiku animál iha área urbana ne’e aplika iha sub-rejiaun Pante Makasar área urbana ba suku (5) mak hanesan, suku Costa, Nipani, Lifau, Cunha no Lalisuk

Jornalista : Abilio Elo Nini

Editór      : Cancio Ximenes

HAKEREK NO HATÁN

Please enter your comment!
Please enter your name here