Xefe Departamentu Jestaun Arkivu no Dokumentasaun, Eugenio Sarmento. Imajen Tatoli/Nelia Fernandes.

DILI30 juñu 2021 (TATOLI)—Governu liuhosi Sekretáriu Estadu Arte no Kultura (SEAK), segunda (28/06) halo sensibilizasaun kona-ba importánsia proteje patrimóniu kulturál ba estudante, lia-na’in no instituisaun relevante sira iha munisípiu Viqueque, postu administrativu Lacluta.

Xefe Departamentu Jestaun Arkivu no Dokumentu, Eugeniu Sarmento, hateten SEAK implementa sensibilizasaun ne’e iha munisípiu Viqueque ne’ebé lokaliza iha Lacluta, tanba fatin ne’e izoladu ladún asesu informasaun kona-bá valór kulturál, entaun SEAK iha dever atu hakbesik ba sira hodi halo sensibilizasaun kona-bá valor kulturál ne’ebé Timor-Leste iha.

Notísia Relevante: Governu sei konserva abrigu Japonés iha Timor-Leste

“Iha sensibilizasaun ne’e, ami halo aprezenta ba komunidade atu bele hatene valór kulturál iha ida-idak nia rain. Iha kontestu ida-ne’e, oinsá atu muda mentalidade sosiedade nian no oinsá fó importánsia proteje partimóniu kulturál materiál no immateriál,” Eugenio Sarmentu ba Agênsia Tatoli, iha nia knaar fatin, Avenida Portugal, Díli, ohin.

Nia hatutan, sensibilizasaun ne’e ho objetivu atu komunidade presiza hatene poténsia saida mak Timor-Leste iha liu-liu iha kontestu kultura Timor-Leste nian no oinsá estudante no lian-na’in sira tenke hetan esperiénsia uitoan kona-bá poténsia kulturál ba rai Lacluta nian no saida de’it mak presiza proteje no promove hodi dezenvolve iha kontestu kultura nian.

“Tanba iha kultura ne’e la’ós nia vantajen atu hametin ita-nia unidade no pás maibé bele fó vantajen ba aspeitu turizmu hodi bele hetan retornu ba ita-nia rain, ho nune’e oinsá atu alkansa objetivu ne’e mak ita hakbesik aan ba komunidade atu muda sira-nia mentalidade, nune’e sira bele valoriza poténsia ne’ebé ita iha,” nia hateten.

Patrimóniu kulturál iha munisípu Viqueqeu liu-liu kultura materiál imovel iha postu administrativu Lacluta mak hanesan Fortaleza tradisionál, rezidênsia administradór, Edifisiu Administrasaun Públiku eransa português sira nian, rate lulik sira, uma lulik sira.

Enkuantu kultura materiál movel sira mak hanesan belak, kaibauk, surik, biti, objetu kultuál, tais, lia-na’in, liurai dadolin, norma oinsá respeita inan-aman no oinsá valóriza ema mate.

Nia dehan, durasaun ba sensibilizasaun ne’e la’o loron ida iha munisípiu Viqueque, postu administrativu Lacluta no tuir planu iha tempu badak sei halo fali iha munisípiu Baucau.

Tuir artigu 2 hosi rezolusaun Governu Nú. 25/2011 alínea c), hosi dekretu-lei Nú. 33/2017 define, Patrimóniu Kulturál mak sasán hotu-hotu, movel no imovel, materiál ka la’ós materiál (immateriál), tan ninia importânsia no valór mesak mak fó kontribuisaun, hodi afirma identidade kulturál komunidade, rai ka rejiaun ida-nian, no nune’e presiza sai nu’udar alvu atu halo identifikasaun, investigasaun, klasifikasaun no sai mós nu’udar sasukat atu halo konservasaun no protesaun, Patrimóniu Kultural Timor-Leste ni’an, sei buka leno valór hirak hosi memória, antigu, auténtiku, orijinál, raru ka ezemplár hosi ninia povu.

Iha alinea d) rezolusaun Governu Nú. 25/2011, 14 setembru, kona-ba Protesaun ba Patrimóniu Kulturál no tipu sira hosi Patrimóniu Kulturál iha Timor-Leste mak hanesan;  

Patrimóniu Arkeolójiku mak sasán sira iha rai no bee okos, hanesan mós fatin Arkeolójiku, inklui pintura rupestre no sasán hirak ne’ebé hetan hosi fatin hirak arkeolójiku ni’an.

Patrimóniu Etnográfiku no Tradisionál, Movel no Imovel mak hanesan arkitéktura tradisionál, fatin lulik nian no sasán etnografiku no tradisionál mak ka’it ba kultura moris.

Patrimóniu Imateriál mak hanesan, tradisaun orál, buat hirak ne’ebé hateten ho ibun no lian hahalok sosiál, rituál no festa sira, matenek tradisionál no hahalok kona-ba natureza no jestaun ba rekursu naturál sira, nomós arte tradisionál no espetákulu hanesan múzika, dahur no aiknanoik.

Jornalista : Nelia Fernandes 

Editór       : Cancio Ximenes

HAKEREK NO HATÁN

Please enter your comment!
Please enter your name here