Saudozu Sabalae no Metan. Imajen/Espesiál

DILI, 29 juñu 2021 (TATOLI)-Família Saudozu Pedro Nunes ‘Kery Laran Sabalae’ no Remigio Levi da Costa Tilman ‘Metan ka Irak’, selebra seremónia eukaristia hodi hanoin hikas tinan lakon no mate ba-dala 26.

Iha Misa Eukaristia ne’e, Amu selebrante Patroçino da Cunha, hateten, Saudozu Sabalae no Metan  nia mate hodi liberta pátria ka ukun rasik-an.

“Ita hamutuk harohan ba Maromak, atu saudozu na’in-rua (Sabalae no Metan) bele hetan reinu lalehan, tanba sira sakrifika vida hamutuk ho Saudozu seluk mak ita hetan ukun rasik-an,” Amu Patrocino hateten iha ninian omília durante seremónia eukaristia  iha Igreja Katedrál Dili,  tersa ne’e.

Família Saudozu Sabalae no Metan partisipa Misa Eukaristia, iha Igreja Katedral, Villa-verde, Dili. Imajen TATOLI/Florêncio Miranda Ximenes

Amu husu ba família Saudozu atu hasa’e orasaun liuhosi Misa Eukaristia, atu eroi Sabalae no Metan bele hetan reinu lalehan hodi fó grasa moris ba família no país ne’e.

Sekretáriu Conselho Executivo da Luta da Frente Clandestina (CEL/FC), Kery Laran Sabalae, ho naran sarani Pedro Nunes hamutuk ho ninian asistente Metan nia lakon, hanesan parte ida hosi prosesu indepéndesia.

“Ita husu ba Maramok no eroi sira atu kontinua fó grasa ba ita hotu ne’ebé sei moris atu hatutan sira-nia mehi hodi liberta povu,” Amu harohan.

Eroi sira ne’ebé luta no fó an ba mate tanba hakarak Timor-Leste hetan nia indepénsia hosi okupasaun Indonézia.

Kery Laran Sabalae no Metan lakon no mate iha loron 29 juñu 1995, bainhira fila hosi Ermera kuandu hala’o hela misaun luta ba ukun rasik-an.

Notísia Relevante: “Keri Laran Sabalae” Nia Istória Luta

Saudozu  Keri Laran Sabalae moris iha  k’nua Susuara, Aldeia Iralafai, Lospalos, Lautém,  iha loron 22 outubru 1955, hanesan oan hosi Lucas Nunes no Felicidade Nunes, maun alin hamutuk na’in-ualu, no hosi sira ne’e mak Duarte Nunes (atuál Prezidente Bankada CNRT iha Parlamentu Nasionál), Victór Nunes, Amelio Nunes no Elsa Nunes no seluk tan.

Familia Saudozu Sabalae no Metan tau ai-funan iha Cruz boot, Santa Cruz, Dili. Imajen TATOLI/Florêncio Miranda Ximenes

Enkuantu, Saudozu Remigio Levi da Costa  Tilman ou kuñesidu ho naran funu ‘Metan ka Irak’, moris iha Uaibobo, Ossu, Viqueque, iha loron 17 agustu 1974,  lakon la husik hela ain-fatin ruma ba família ba no nia kompañeiru da luta luta sira.

Remigio nu’udar oan daruak hosi Eduardo de Araujo Tilman no Luciana da Costa Silva Tilman, iha maun-alin hamutuk na’in-11, mane na’in-sia no feto na’in-rua no hosi maun-alin hirak ne’e, agora hela sira na’in-sia, na’in rua mak fila ona ba mundu seluk.

Hafoin Misa Eukaristia ne’e, família eroi na’in-rua bá sunu lilin no tau ai-funan iha rate Santa Cruz, Dili.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here