Osan Amerikanu. Imajen/Espesiál

DILI, 29 juñu 2021 (TATOLI)Primeiru-Ministru (PM), Taur Matan Ruak, orienta atu elaborasaun Orsamentu Jerál Estadu (OJE) 2022 tenke bazeia ba kbiit halo ezekusaun no rekursu finanseira.

“Ita la hanoin halo buat hotu dala-ida, ita hanoin halo ida tutuir malu, tuir kbiit ne’ebé iha no tuir rekursu finanseira ne’ebé iha, tanba ita dependénsia ba Fundu Petrolíferu no prátikamente kada tinan reseita mai hosi petróleu tun maka’as, tanba ne’e se mantein gasta, naturalmente ne’e sei prejudika ita-nia nasaun,” PM Taur hateten, iha ámbitu Jornada Orsamentál OJE 2022, ne’ebé realiza iha auditóriu MF, Aitarak-laran, tersa ne’e.

Notísia relevante: UPMA-MF hahú prepara OJE 2022 sei iha redusaun programa

Tuir Xefe Governu, MF no Unidade Planeamentu, Monitorizasaun no Avaliasaun (UPMA) mak iha papél atu ko’a verba ne’ebé laiha interese, repetetivu no konsentra ba ida ne’ebé fundamentál no nesesáriu.

Tanba ne’e PM husu servidór Estadu sira kuidadu  bainhira utiliza rekursu finanseira no tenke kontribui mantein sustentabilidade fundu soberanu ba tempu naruk.

“Iha tetu fiskál, bainhira Ministériu Finansa no Parlamentu Nasionál kada tinan diskute orsamentu jerál sira sempre preokupa. Orsamentu entre tinan 2010-2019, orsamentu 2016 mak boot liu ho montante biliaun $1,9, maibé tinan ne’e mak boot liu hotu ho montante biliaun $2,1,” nia akresenta.

Ho hanoin hirak ne’e, kada tinan molok tama ba elaborasaun orsamentu, MF aprezenta senáriu haat, nune’e Governu bele iha preferénsia.

“Ha’u-nia hanoin klaru, Ministériu Finansa sei halo ezersísiu maibé iha ona hanoin atu redús orsamentu 2022,” nia hatutan.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here