Primeiru-Ministru, Taur Matan Ruak. Imajen TATOLI/Egas Cristóvão

DILI, 29 juñu 2021 (TATOLI)-Durante sesaun Jornada Orsamentál ba preparasaun elaborasaun Orsamentu Jerál Estadu (OJE) 2022, Primeiru-Ministru (PM), Taur Matan Ruak, enkoraja servidór Estadu hotu prepara orsamentu tinan oin ho kualidade.

“Kualidade orsamentu importante tebes, atu hetan orsamentu ho kualidade maka iha esforsu hahú tinan 2015 kria Unidade Planeamentu Monitorizasaun no Avaliasaun (UPMA) hodi ajuda tranzita modelu orsamentu anteriór ba modelu orsamentu bazeia ba programa,” PM hateten iha auditóriu Ministériu Finansa (MF), Aitarak-laran, tersa ne’e.

Tanba ne’e, daudaun Governu tuir programa no projesaun hosi UPMA, ne’ebé hosi inisiativa ne’e bele hakat ba orsamentu bazeia ba dezempeñu no ikus liu orsamentu bazeia ba rezultadu.

Aleinde ne’e, MF aprezenta ona kritériu ba orsamentasaun, ne’ebé haktuir iha planu jerál ba nível responsabilizasaun, katak papél governante sira mak atu tau-matan ba programa, enkuantu diretór jerál haree ba sub-programa sira, no diretór nasionál sira ba iha nível atividade.

Notísia relevante: Governu hahú diskute prioridade no determina tetu fiskál tinan 2022

“Entaun iha ne’e ajuda ita idaidak hatene ninia papél, ita la hein sala mak ita fó sala ba ida, maibé ita hotu sei asume responsabilidade, kompleta malu atubele implementa ita-nia programa, sub-programa, no atividade atu alkansa meta ne’ebé determina iha ministériu sira, ne’ebé hola parte ba rekezitu ida bainhira hakarak iha orsamentu tenke iha kualidade,” Xefe Governu akresenta.

PM notak katak kada tinan instituisaun Estadu haree liu osan hira mak gasta ona, maibé la haree gasta ba saida no rezultadu saida mak hetan.

“Entaun ha’u hanoin, VI Governu hahú halo esforsu ida to’o mai VIII Governu, atu atinje ida-ne’e iha pasu lubuk ida mak ita halo no tinan ida-ne’e ita hakat ba orsamentu bazeia ba programa, maibé ida-ne’e de’it sei la to’o,” Xefe Governu rekoñese.

Mudansa modelu ida ba modelu seluk implika mós ba kritériu lubuk ida ne’ebé Governu tenke tuir, hanesan presiza hadi’a nível planeamentu.

Durante ne’e, Governu utiliza dokumentu Planu Estratéjiku Dezenvolvimentu Nasionál (PEDN) nu’udar planu longu prazu, no planu anuál.

“Planeamentu ne’e iha objetivu atu ajuda ita sistemátiku liután no ajuda ita evita arbitralidade katak halo buat ne’ebé ita hakarak no nunka halo buat ne’ebé ita la presiza halo. Aleinde ne’e definisaun ba setór importante sira hanesan setór prioridade kada tinan iha haat hanesan setór sosiál, ekonomia, infraestrutura no institusionál,” PM esplika.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here