Provedora Direitu Umanu no Justisa, Jesuína Maria Ferreira Gomes. Imajen Tatoli/Egas Cristóvão.

DILI, 29 juñu 2021 (TATOLI)—Provedoria Direitu Umanu no Justisa (PDHJ) liderada Provedora Jesuína Maria Ferreira Gomes, tersa ne’e aprezenta relatóriu anuál 2020 nian ba Parlamentu Nasionál.

Iha aprezentasaun relatóriu anuál 2020 ne’e aprezenta baze legál, vizaun, misaun no planu estratéjiku, implementasaun ativiudade, dezafiu no ikusliu rekomendasaun.

Ezisténsia PDHJ bazea ba Konstituisaun RDTL artigu 27, 150 no 151, lei númeru 7/2004 kona-ba estatatutu PDHJ, dekretu-lei númeru 31/2016, lei organika PDHJ, prinsípiu París nomoos prinsípiu Venice.

PDHJ nia planu asaun anuál 2020 no planu orsamentál dezenvolve bazea ba Planu Estratéjiku Dezenvolvimentu Nasionál (PEDN) iha área setór justisa nian, Objetivu Dezenvolvimentu Sustentável (ODS) 16 kona-ba pás, justisa, reforsa institusionál nomoos objetivu 5 ne’ebé ko’alia kona-ba igualdade jéneru. PDHJ nia vizaun no misaun proteje diretu umanu, hametin integridade no promove governansaun di’ak iha Timor-Leste.

Ho planu estratéjiku 2011-2020 iha área haat (4) mak hanesan asegura autoridade públiku no iha koñesimentu di’ak kona-ba direitu umanu no governasaun di’ak, garante autoridade no halo prevensaun no halo korresaun ba violasaun prinsípiu direitu umanu no governasaun di’ak, ema vulnerável iha protesaun hasoru abuzu direitu umanu no bele hetan asesu di’ak ba atendimentu públiku, asegura kapasidade no independénsia PDHJ hodi bele implementa mandatu ho di’ak.

PDHJ nia planu asaun anuál no planu orsamentu 2020 iha programa rua kompostu hosi direitu umanu no boa-governasaun (governasaun di’ak) no jestaun institusionál.

Nune’e mós iha sub-programa hamutuk neen (6), investigasaun, promosaun, fiskalizasaun, rekomendasaun, jestaun rekursu umanu, boa governasaun, jestaun institusionál no iha atividade 61.

Provedora Direitu Umanu no Justisa (PDHJ), Jesuína Maria Ferreira Gomes, esplika iha 2020 PDHJ konsege implementa atividade hamutuk 53 no atividade ualu (8) mak la implementa tanba situasaun Dotasaun Orsamentu Temporáriu (DOT) ka orsamentu duodesimál, situasaun COVID-19, impase polítiku no OJE 2020 xumbadu iha Parlamentu Nasionál.

Nia hatutan, aprezentasaun atividade bazea ba prioridade ka objetivu haat (4) mak formasaun kona-ba direitu umanu no governasaun di’ak, simu kesar no halo investigasaun ba kazu violasaun direitu umanu nomós violasaun governasaun di’ak, fiskalizasaun no rekomendasaun ba instituisaun públika sira no ida ikusliu mak governasaun di’ak no jestaun institusionál.

Iha 2020, PDHJ ho nia parseiru sira hanesan Ministériu Defeza no Unidade Asesoria Direitu Umanu fornese formasaun ba membru F-FDTL hamutuk 70 kompostu hosi feto na’in-neen (6) no mane 64 ba komponente Terrestre iha Baucau nomoos Polísia Militár iha Dili.

Formandu sira akumuladu hosi tinan 2017 to’o 2020 hamutuk 267 kompostu hosi feto 28 no mane 239.

PDHJ rejista keixa iha 2020 hamutuk 246

Provedora Direitu Umanu no Justisa (PDHJ), Jesuína Maria Ferreira Gomes, informa iha 2020 rejista keixa hosi kesar-na’in sira hamutuk 246 kompostu hosi direitu umanu nian 152 (62%) no boa-governasaun nian 94 (38%).

PDHJ iha delegasaun territorial hamutuk haat (4) kompostu hosi delegasaun territoriál Baucau rejista keixa 35, delegasaun territoriál Maliana rejista 15, delegasaun territoriál Same rejista 35 no Rejiaun Administrativa Espesiál Oé-Cusse Ambeno (RAEOA) rejista keixa sia (9).

Hosi totál keixa hamutuk 246 ne’ebé keixa hosi mane hamutuk 179, feto 54 no keixa anónimu hamutuk 13.

Hosi keixa hirak ne’e, PDHJ loke ba investigasaun hamutuk 98, loke rekere 30, taka no arkiva 18, taka haruka 81, adia desizaun ida (1) no seidauk halo avaliasaun preliminár 18.

Nune’e mós dadus keixa tuir munisípiu, Dili okupa fatin ne’ebé aas liu hamutuk keixa 104, Aileu lima (5), Ainaro lima (5), Baucau 31, Bobonaro 31, Covalima iha sia (9), Ermera lima (5), Lautém hitu (7), Liquiçá sia (9), Manatuto tolu (3), Manufahi 19, RAEOA 13 no Viqueque ualu (8).

“Kazu hamutuk 98 mak loke ba investigasaun kompostu hosi kazu direitu umanu 53 no kazu boa-gorvasaun hamutuk 45. Iha 2020 PDHJ finaliza relatóriu investigasaun finál hamutuk 115,” Provedora Direitu Umanu no Justisa (PDHJ), Jesuína Maria Ferreira Gomes, aprezenta relatóriu 2020 ba Parlamentu Nasionál.

Provedora hatutan, relatóriu investigasaun finál ne’e fahe ba tolu mak hanesan relatóriu investigasaun finál ho rekomendasaun signifika akontese violasaun direitu umanu ka boa-governasaun, relatóriu investigasaun finál ho sujestaun katak la akontese violasaun maibé presiza halo sujestaun ba iha instituisaun relevante no relatóriu investigasaun finál arkivu katak la akontese violasaun ka kesar-na’in retira nia keixa ka rezolve hotu ona.

Nune’e, relatóriu investigasaun finál ho rekomendasaun ne’ebé mak konklui iha 2020 hamutukn 22, diretu umanu nian 12 no boa-governasaun nian hamutuk 10.

Tipu violasaun ba boa-governasaun barakliu ba iha administrasaun ladi’ak hamutuk kazu 35, sees hosi podér iha kazu 20 no ilegalidade iha kazu neen (6).

Hosi parte tipu violasaun ba direitu umanu nian barakliu mak liga ba direitu ho liberdade, integridade no seguransa hamutuk iha kazu 41, selu direitu ba onra no privasidade iha kazu lima (5), direitu ba violasaun korrespondénsia nian iha kazu haat (4).

Instituisaun 15 iha kazu violasaun ba governasaun di’ak

Provedora Direitu Umanu no Justisa fó-sai katak, investigasaun ba entidade hamutuk 15 iha serbisu administrasaun públika.

Instituisaun 15 ne’e komposta hosi Ministériu Edukasaun, Juventude no Desportu (MEJD) iha kazu boa-governasaun hamutuk haat (4) no direitu umanu iha haat (4), Ministériu Saúde (MS) iha kazu violasaun ba boa-governasaun hamutuk neen (6), Sekretaria Estadu Terra no Propriedade (STP) kazu governasaun di’ak iha ualu (8).

Nune’e mós Komisaun Antí Korrupsaun (KAK) iha kazu ida (1), Polísia Nasionál Timor-Leste (PNTL) iha kazu direitu umanu nian hamutuk 46 no violasaun ba boa-governasaun iha kazu tolu (3), Ministériu Finansa (MF) iha kazu boa-governasaun ida (1), Ministériu Obra Públika (MOP) iha kazu violasaun boa-governasaun ida (1) no Ministériu Justisa iha kazu violasaun boa-governasaun lima (5).

Iha Ministériu Administrasaun Estatal (MAE) iha kazu violasaun boa-governasaun neen (6) no direitu ida (1), SEFOPE iha kazu boa-governasaun tolu (3), FALINTIL-Forsa Defeza Timor-Leste (F-FDTL) iha kazu direitu umanu rua (2) no kazu violasaun ba boa-governasaun ida (1), Ministériu Agrikultura no Peska (MAP) iha kazu boa-governasaun ida (1).

Hosi parte RAEOA iha kazu boa-governasaun tolu (3), Ministériu Defeza iha kazu boa-governasaun ida (1) no totál kazu hamutuk 98.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here