OÉ-CUSSE, 29 juñu 2021 (TATOLI)—Prezidente Autoridade Rejiaun Administrativa Espesiál Oé-Cusse Ambeno (RAEOA), tersa ne’e inaugura kuarentena Kiumaonteko ne’ebé lokaliza iha aldeia Sanane, suku Costa, sub-rejiaun Pante Makasar.
Prezidente Autoridade RAEOA, Arsénio Paixão Bano, hateten autoridade iha planu rezerva ba obra kuarentena sira bainhira pandemia COVID-19 ramata, planu ba futuru ne’e kuarentena Kiumaonteko sei nakfilak ba sentru saúde zona sentrál Pante Makasar ninian.
Notísia Relevante: Autoridade RAEOA: Oé-Cusse tenke livre hosi COVID-19
“Obra ida ne’e kualidade tebes. Obra ne’e la’ós de’it nia kualidade maibé importante tanba iha future ne’e, uma ne’e sei sai sentru saúde zona sentrál Pante Makasae ninian,” Arsenio Paixão hato’o iha ninia diskursu bainhira inaugura kuerentena Kiomaonteko.
Tuir nia, iha tinan 10 ne’ebé mai kuarentena ne’e bele sai mós óspital referál, tanba ne’e mak autoridade hanoin ona katak harii kuarentena Kiumaonteko ne’e nia objetivu ba futuru ne’e atu sai sentru saúde no bainhira populasaun aumenta mak bele nakfilak óspital referral Óe-Cusse nian.
Tanba ne’e, nia apela ba populasaun sira-ne’ebé hela besik iha aldeia Sanane, bairru Masin, Numbei, Samoro mezmu to’o Padiae suku Cunha no Lalisuk, sira husi Sakato, suku Nipani, sub-rejiaun Pante Makasar, futuru la persiza ba konsulta ona iha óspial referál mai de’it iha sentru saúde zona sentrál.
Autoridade ne’e informa, obra foun ne’e sei la sai kuarentena maibé sei sai uluk fatin izolamentu atu troka Klínika Coração ka hamutuk ho Klínika Coração, nune’e sé mak pozitivu COVID-19 mak tama iha fatin ne’e, sira-ne’ebé sei tama kuarentena sei ba hotu iha kuarentena Portu Mahata.
“Ne’e atu halo saida. Ne’e para ita ta’is sé mak moras labele tama Oé-Cusse. Se moras ita deteta iha ne’e, depois nia kondisaun rekupera mak sai,” nia dehan.
Entretantu Xefe Aldeia Sanane, suku Costa, Fransisco Ais hateten mensajen ne’ebé prezidente autoridade hato’o ba populasaun sira-ne’e loos tanba populasaun iha aldeia Sanane konkorda katak fatin ne’e bele uza ba sentru saúde iha futuru sai fasilidade públiku nian.
“Polítika autoridade kapaas. Nu’udár autoridade lokál iha aldeia Sanane, lori komunidade nia naran agradese ba planu autoridade RAEOA, tanba ne’e hanesan preparasaun ba jerasaun tinan 10 mai,” Nia dehan.
Entretantu, orsamentu ba konstrusaun kuarentena ne’e mai hosi fundu COVID-19 ne’ebé konstrui hosi empreza Tera Santa Unipesoál, ho kustu totál $165,625.54 ho durasaun kontratu fulan (4) implementa servisu fulan (6), no medida ba kuarentena ne’e metru 40×10 kompostu hosi kuartu hamutuk 23 ho fasilidade kompletu
Jornalista : Abilio Elo Nini
Editór : Cancio Ximenes
