Konstrusaun uma ba veteranu ho grau luta tinan 20-24 nia laran, saudozu Mau Tino, iha Manufahi. Imajen/Facebook: Fukun Timor News.

DILI, 29 juñu 2021 (TATOLI)—Prezidente Konsellu Veteranu, Vidal de Jesus “Riak Leman”, hateten maske iha situasaun pandemia COVID-19 nia laran maibé Konsellu Veteranu Manufahi observa katak família veteranu ho grau luta tinan 20-24 nia laran, saudozu Mau Tino, konsege konstrui ona uma no iha tempu badak Konsellu Veteranu nasionál sei halo inaugurasaun ba uma refere.

Notísia Relevante: Governu aprova apoia $40.000 ba kada veteranu konstrui uma

“Kona-ba saudozu Mau Tino nia uma ne’e, sira hato’o ona mai katak ba halo inaugurasuan ba uma saudozu nian. Maibé, ha’u dehan sei iha situasaun pandemia COVID-19 entaun ita labele ba ne’ebá. Maibé, iha tempu badak Konsellu Veteranu sei ba inaugura no sei entrega ba nia na’in hodi hela,” Vidal de Jesus “Riak Leman” Leman hateten ba Agéncia TATOLI, liuhosi telefónika, tersa ne’e.

To’o agora, Vidal de jesus hatutan, Konsellu Veteranu labele halo observasaun ba konstrusaun uma veteranu tinan 24 tanba estadu emerjénsia no serka sanitaria, entaun atividade konstrusaun uma ba veteranu sira-nian ne’e labele la’o maibé bainhira Governu hakotu ona serka sanitária iha munisípiu hotu mak Konsellu Veteranu sei halo vizita no halo observasaun.

“Daudaun ne’e, ita-nia ekipa Konsellu Veteranu Munisipál mak kontinua akompaña prosesu kontrusaun. Tuir ha’u-nia hatene, to’o agora uma rua mak finaliza ona. Ida mak veteranu Afonso Malibuti iha Metinaro ne’ebe entrega no na’in uza ona no saudozu Mau Tino nian ne’ebé konstrui hela ba nia feen no oan na’in rua iha Same ne’e, besik finaliza ona,” nia dehan.

Prezidente Konsellu Veteranu ne’e hateten, veteranu barak mak seidauk konstrui uma maske balun konstrusaun atu besi finaliza tanba pandemia COVID-19 no kalamidade públiku ne’ebé akontese iha loron 4 abríl liubá ne’e, impede servisu konstrusaun sira-ne’e.

“Ha’u fiar katak, tinan ne’e nia-laran bele finaliza no entrega ba na’in tanba serka sanitária iha munisípiu balun hahú loke no hela Munisípiu Baucau no Dili de’it. Tanba ne’e, ekipa veteranu ida-idak bele sosa materiál konstrusaun nian,” Riak Leman hateten.

Prezidente Konsellu Veteranu ne’e informa, uma veteranu ne’ebé agora iha faze konstrusaun ne’e ba na’in-90 tuir osan ne’ebé prevee iha Orsamentu Jerál Estadu (OJE) 2020 no iha tinan 2021 nian sei aumenta tan ba veteranu liu na’in-10.

Entretantu, Prezidente Konsellu Veteranu Munisípiu Manufahi, Tobias Amaral Magno “Maksakur”, hateten Konsellu Veteranu Munisípiu Manufahi hamutuk ho família saudozu halo kontaktu ho Empreza Leohili hosi Same nian mak halo konstrusaun uma ba saudozu Mau Tino nian.

“Ami Konsellu Veteranu munisipál hamutuk ho família saudozu Mau Tino hodi buka empreza no ami konsege hetan Empreza Leohili hosi Same nian mak durante ne’e konstrui uma ne’e,” nia dehan.

Tuir nia, Empreza Leohili la’ós Governu mak selu maibé saudozu Mau Tino nia família mak selu liuhosi osan ne’ebé Ministériu Asuntu Kombatente Libertasaun Nasionál (MAKLN) haruka montante rihun $40 ba kada veteranu ida-nia bankária mak deside hodi halo konstrusaun no selu ba empreza ne’e.

Nia haktuir, tuir informasaun ne’ebé empreza relata ba Konsellu Veteranu Munisipál katak semana rua tan bele finaliza ona, nune’e Prezidente Konsellu Veteranu munisipál bele informa tután Konsellu Veteranu iha nasionál nune’e sira mós bele hatene prosesu konstrusaun uma veteranu sira-nian ne’e.

Konstrusaun uma ba saudozu Mau Tino ne’e ho durasaun konstrusaun fulan tolu no semana rua tan bele finaliza no entrega ona ba saudozu nia oan na’in rua ho feen hodi hela.

Notísia Relevante: MAKLN sei aloka osan $2,400,000 konstrui uma 60 ba veteranu

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here