Negosiante ‘roda-tolu’, Francisca de Fátima. Imajen Tatoli/Arminda Fonseca

DILI, 29 juñu 2021 (TATOLI)- Negosiante ‘roda-tolu’ sira ne’ebé durante ne’e hala’o sira-nia atividade buka moris hodi fa’an sasán iha fatin públiku iha Dili laran, komesa hetan fali ona rendimentu hafoin Governu  hakotu konfinamentu domisiliáriu (KD) iha kapitál Dili.

Marculina da Silva, negosiante ‘roda-tolu’ iha área Faról, Dili, hateten durante Governu aplika konfinamentu domisiliáriu iha kapitál Dili, laiha rendimentu no fó prejuízu boot  tanba sasán ne’ebé fa’an iha ‘roda-tolu’ nia laran ne’e lafolin total.

“Kontente tanba bainhira ita-nia Governu hakotu konfinamentu obrigatóriu no autoriza transporte públiku halo movimentu normál halo  sasán ne’ebé ami fa’an iha estrada ibun mós hahú folin no hetan rendimentu di’ak uitoan ona,” Marculina da Silva hateten ba Agência Tatoli bainhira hala’o hela atividade negósiu ‘roda-tolu’, tersa ne’e.

Nia hateten, molok ne’e atu hetan de’it rendimentu $1.00 mós difisil tebe-tebes. Maibé agora loron ida nia bele hetan rendimentu entre $10.00 to’o $15.00.

Lia-fuan hanesan mós hato’o hosi nia feto maluk, Francisca Fatima, ne’ebé fa’an mós sasán iha ‘roda-tolu’ iha área Tasi-Tolu nian.  Nia hateten, ho movimentu mikrolete nian iha Dili laran, liuliu mikrolete sira route 010, Comoro, Tasi-Tolu to’o Bidau, sempre sosa sira-nia sasán.

Sasán-sira ne’ebé Marculina ho Francisca fa’an iha ‘roda-tolu’ laran, maka hanesan sigarru, pulsa telefone, bebidas-sira (coca-cola, bintang, sprite, delos, etc) água, biskoit no seluk-seluk tan.

“Atu dehan de’it katak agora ami hetan rendimentu kompara ho situasaun konfinamentu obrigatóriu,” Francisca hateten.

Hosi sorin seluk, Jefri Soares, nu’udar kondutór mikrolete númeru 010, hateten, situasaun agora muda uitoan ona kompara ho tempu konfinamentu obrigatóriu. Maske nune’e, pasajeiru mikrolete nian seidauk rame hanesan tinan-sira molok pandemia COVID-19.

“Ha’u foin lori karreta halai besik semana ida ona, maibé rendimentu mak tun loos, loron ida ami halai hetan osan sa’e liu $30.00 tun liu $10.00, tanba estudante sira mós seidauk eskola,” Jefri Soares hateten.

Salvador da Cruz Pires, sofer mikrolete 011 ne’ebé halai Tasi-Tolu, Merkadu Manleuana  ba-mai, triste tanba loroloron halai karreta pasajeiru laiha, maibé nia agradese ba Governu tanba hakotu ona konfinamentu obrigatóriu hodi autoriza sira halai fali karreta.

“Maske agora eskola seidauk la’o ne’e mak ami seidauk hetan rendimentu, maibé ha’u fiar katak bainhira eskola la’o normál fali ami sei hetan rendimentu di’ak, importante mak Governu autoriza ami hala’o atividade normál,” nia hateten.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here