Bee-moos. Imajen/Espesiál

DILI, 29 juñu 2021 (TATOLI)—Reprezentante Povu iha uma fukun Parlamentu Nasionál, husu VIII Governu Konstitusionál tenke halo jestaun didi’ak ba distribuisaun bee-moos iha sidade Dili tanba komunidade barak enfrenta krize bee-moos.

Deputadu Bankada Frente Revolusionária Timor-Leste Independente (FRETILIN), Fabião de Oliveira, levanta kestaun bee-moos ligadu ba jestaun operasionál no jestaun rekursu umanu iha sidade Dili.

“Oras ne’e iha kapitál Dili, liu-liu iha suku Comoro, aldeia Moris Foun, aldeia 30 Agostu, aldeia 4 Setembru ne’e falta bee-moos no laiha bee-moos. Komunidade oras ne’e kaer jerigen lori ba buka bee-moos atubele sustenta sira-nia moris hanesan ba konsumu no hariis. Problema tanba mákina avaria, mákina boot ne’e supa bee iha Comoro ne’e avaria tanba jestaun operasaun ladún di’ak, jestaun manutensaun ladún di’ak,” Deputadu Bankada FRETILIN ne’e lavanta liuhosi plenária, tersa ne’e.

Nia haktuir, iha tinan barak Governu investe orsamentu ba bee-moos maibé iha loron haat ka lima ona bee-moos la funsiona, tanba ne’e Governu haree sasán sira-ne’e atubele hala’o jestaun ho di’ak.

Nia husu Governu halo normalizasaun hodi halo manutensaun ba mákina sira-ne’e, nune’e labele difikulta distribuisaun bee-moos ba komunidade sira.

“Agora relasaun ho jestaun rekursu umanu, ne’ebé ke durante ne’e água no saneamentu prodús rekursu umanu ne’ebé ke ho ténika profisionál, Governu investe osan barak hodi ba tuir formasaun iha área oioin, atubele halo operasaun ba mákina sira, operasaun ba iha kanalizasaun sira. Maibé la aproveita rekursu sira-ne’ebé sufisiente atubele halo operasaun ba iha mákina ho kanalizasaun bee-moos. Ne’e iha Dili de’it, ita la hatene munisípiu sira seluk,” nia dehan.

Jornalista : Evaristo Soares Martins

Editór       : Cancio Ximenes

 

HAKEREK NO HATÁN

Please enter your comment!
Please enter your name here