Estudante Eskola Ensinu Sekundáriu Jerál Nobel da Paz, Dili. Imajen Tatoli/Dok

DILI, 29 juñu 2021 (TATOLI) – Eskola Ensinu Sekundáriu Jerál (ESJ) Nobel da Paz, Dili, hahú halo preparativus ba ensinu aprendizajen prejensiál.

Notísia Relevante : EBC 30 agostu, halo limpeza prepara ba ensinu aprendizajen prejensiál

Preparasaun dahuluk ne’ebé sira halo maka estudante ho profesór-sira hahú mobiliza malu halo limpeza iha aula-laran ho nia arredores sira.

Diretór ESJ Nobel da Paz, Pedro Nunes,  atividade limpeza ne’e hodi prepara kondisaun, katak bainhira Governu re-ativa aula prejensiál, maka ambiente eskola komesa moos hosi fo’er no rai-rahun.

“Ha’u haree estudante-sira entuziazmu loos hodi ajuda profesór-sira iha limpeza ne’e. Sira hakarak atividade eskola bele lao ona tanba kleur liu ona sira iha uma de’it no lakon matéria aprendizajen lubuk,” Pedro Nunes informa ba Agência Tatoli, tersa ne’e, iha eskola Nobel da Paz, Kintal-Boot, Dili.

Iha fatin hanesan,  estudante désimu primeiru anu hosi ESJ Nobel da Paz, Gabriel Sarmento Carvalho, hateten sira hakarak tebes atu re-ativa ensinu aprendizajen prejensiál atu bele rekupera fali matéria lubun ne’ebé  merese ba estudante atu hetan no aprende hamutuk hosi profesór-sira.

“Ami hamutuk ho profesór sira halo ona limpeza. Ami hein iha fulan jullu, tinan ne’e, eskola Nobel da Paz bele tama iha kategoria eskola ne’ebé preparadu ona atu re-ativa aula prejensiál,” Gabriel Sarmento Carvalho tenik.

Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here