Jestór Sub-Rejiaun Nitibe, Manuel Tolan. Imajen Tatoli/Abilio Elo Nini.

OÉ-CUSSE, 29 Juñu 2021 (TATOLI)—Autoridade lokál sira iha sub-rejiaun Nitibe husu ba VIII Guvernu konstitusionál liuhosi Autoridade RAEOA atu konstrui postu Unidade Patrollamentu Fronteira (UPF) ida iha bairru Fatusobe, aldeia Fatu-Nababu, suku Uistaco, nune’e bele apoiu seguransa iha liña fronteira terrestre tanba área fronteira iha Nitibe luan.

Notísia Relevante: Autoridade RAEOA: Oé-Cusse tenke livre hosi COVID-19

“Ha’u hato’o ha’u-nia sujestaun ba Guvernu liuliu autoridade RAEOA atu konstrui postu UPF ida iha Fatusobe, tanba postu UFP Noa-Ana halo patrollamentu ba Citrana dook tebe-tebes., ne’ebé ita-nia komunidade sira iha Usitaco ba to’o bairru Bieli livre ema tama sai halo transaksaun ilegál barak akontese iha fatin ne’ebá durante ne’e,” Jestór Sub-Rejiaun Nitibe, Manuel Tolan, hatoo lia hirak ne’e iha enkontru avaliasaun progresu servisu iha salaun administrasaun Numbei, suku Costa, sub-rejiaun Pante Makasar, tersa ne’e

Nia husu Governu tenke tau atensaun sériu tanba problema ne’ebé akontese iha fronteira Fatisobe ne’e tinan barak ona mak sidadaun sira hosi rai sorin (Indonézia) mai Nauk Ai-kameli, ai-maran iha komunidade sira nia toos inklui na’ok animal iha Nitibe.

“Tanba durante ne’e ema tama sai di’ak hela, maibé agora situasaun COVID ladún iha movimentu maibé iha tempu estadu normál hanesan antes moras COVID-19 sedauk mosu ne’e,  movimentu iha ne’eba livre tanba área luan liu,” nia fó hanoin.

Iha oportunidade hanesan, Xefe suku Usitaco, sub-rejiaun Nitibe, Hilario Babo reforsa-tan katak durante períodu estadu emerjensia no serka sanitária implementa iha RAEOA, autoridade lokál kontribui maka’as ba seguransa iha fronteira tanba distansiamentu iha liña fronteira luan-liu

“Durante estadu emerjensia no serka sanitária, ami autoridade lokál hanesan intelijensia tenke ba hafuhu ema tama-sai fronteira iha tempu kalan no loron. Durante ne’e ami kontribui kaer ema barak kuaze na’in-20 ona. Balun ami kaer ita-nia ema rasik mak hala’o transaksaun ilegál, sira tama-sai tanba iha área fronteira Citrana luan-liu. Tanba ne’e, husu autoridade tau ba ajenda, nune’e hato’o ba parte relevante hodi toma konsiderasaun,” Hilario Babo sujere

Hatán ba preokupasaun ne’e, Sekretáriu Rejionál Asuntu Administrasaun RAEOA, Martinho Abani Elo, hateten autoridade sei hato’o asuntu ne’e ba parte seguransa nune’e bele relata ba superiór sira.

Jornalista : Abilio Elo Nini

Editor       : Cancio Ximenes

HAKEREK NO HATÁN

Please enter your comment!
Please enter your name here