Kondisaun merkadu iha Batugade. Imajen Tatoli/Sérgio da Cruz.

BOBONARO, 29 juñu 2021 (TATOLI)—To’o oras ne’e abitante hamutuk 505 iha aldeia Pipglak II, suku Tapo-Memu, postu administrativu Maliana, munisípiu Bobonaro, seidauk simu Cesta Bázika.

“Aldeia tomak la simu. La’ós ida-ne’e de’it maibé iha tan reklamante hamutuk 262. Osan mai hela maibé sasán mak laiha fali. Ida ne’e mak ha’u preokupa los,” Xefe suku Tapo-Memu, Joaquim Baptista dos Santos  hateten ba jornalista Agência Tatoli, iha Jináziu Maliana, tersa ne’e.

Notísia relevante:Vítima dezastre naturál 115 iha Bobonaro simu materiál konstrusaun

Joaquim Baptista dos Santos, esplika razaun família iha  aldeia Pipgalak  la simu Cesta Bázika ne’e tanba iha suku Tapo-Memu iha aldeia Pipgalak  I no II, no iha lista distribuisaun Cesta Bázika iha de’it aldeia Pipgalak, maibé la fahe ba Pipgalak I no II, tanba ne’e maka distribuisaun Cesta Bázika ba de’it Pipgalak I.

Preokupasaun ne’e Autoridade lokál hato’o kedan ba kompañia implementadór iha momentu distribuisaun, maibé to’o agora seidauk hetan resposta.

Nune’e mós abitante aldeia Pipgalak II, António de Jesus sente ladún satisfáz tanba abitante balun hetan Cesta Bázika maibé balun la hetan.

Totál populasaun iha suku Tapo-Memu hamutuk 5.493, na’in 4.670 simu ona Cesta Bázika, na’in 505 seidauk simu no restu hanesan reklamante.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here