Xefe suku Tapo-Memu, Joaquim Baptista dos Santos. Imajen Tatoli/Sérgio da Cruz.

BOBONARO, 29 juñu 2021 (TATOLI)—Abitante hamutuk 505 iha aldeia Pipgalak II, suku Tapo-Memu, postu administrativu Maliana, munisípiu Bobonaro, seidauk asesu eletrisidade.

“Ha’u-nia populasaun iha aldeia ida ne’e to’o agora ahi la tama. Situasaun ne’e difikulta tebes sira, liuliu estudante sira labele estuda iha tempu kalan. Ha’u preokupa tebes ho situasaun ne’e,” Xefe suku Tapo-Memu, Joaquim Baptista dos Santos, hateten ba jornalista Agência Tatoli, iha Jináziu munisipál Maliana, tersa ne’e.

Notísia relevante:PNDS sosializa programa RKRE ba suku 32 iha Bobonaro

Alende eletrisidade, Autoridade lokál ne’e mós preokupa tanba aldeia ne’e mós kondisaun estrada la diak, difikulta tebes abitante-sira atu lori sira-nia produtu lokál mai faan iha merkadu, inklui susar atu asesu ba fasilidade saúde iha Maliana vila.

Autoridade lokál ne’e rekomenda ba Governu atu konsidera preokupasaun sira ne’e, nune’e laiha diskriminasaun ba povu tanba povu ne’e iha direitu atu asesu ba dezenvolvimentu.

Tuir Joaquim Baptista dos Santos  katak, aldeia ida-ne’e iha bee matan prezervada ne’ebé durante ne’e  fornese mai populasaun sira iha postu administrativu Maliana, maibé aldeia ne’e rasik sei enfrenta difikuldade ba estrada no eletrisidade.

Iha fatin hanesan, abitante aldeia Pipgalak II, João Moniz, hateten populasaun iha aldeia ne’e hala’o moris ne’e ho vida agrikultór, tanba ne’e estrada mak sai difikuldade boot liu, hodi transporta produtu lokál ba merkadu.

“Ami iha fehuk, talas, kumbili, ai-farina, modo-tahan no seluk tan, maibé dalan aat ne’e ami labele ba faan iha merkadu,” nia hateten.

Totál populasaun iha suku Tapo-Memu hamutuk 5.463 ho totál xefe família 1.384, mai hosi aldeia neen mak hanesan, Pipgalak I, Pipgalak II, Lepgen, Kuluati, Tunubibi no Manu-aman.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here