Estudante Colegio Santo Inacio de LOIOLA hahu fali ona prosesu aprendisasen hafoin priense kriteria husi Ministeriu Edukasaun no Ministeriu Saude. Imajen Tatoli/Dok

DILI, 29 juñu 2021 (TATOLI) –  Diretór Servisu Edukasaun Munisípiu Dili (SEMD), Duarte Bragansa, relata katak dadus profesór Munisípiu Dili ne’ebé vasina ona foin 6%.

“Ha’u simu orientasaun hosi Ministru Edukasaun, Juventude no Desportu (MEJD), Armindo Maia, atu akumula dadus hosi profesór no funsionáriu iha kada eskola ne’ebé mak simu ona vasina atu bele relata filafali bá Ministru, maibé dadus iha ha’u nia liman foin maka profesór sira nian,” Diretór Duarte Bragansa, informa  bá Agência Tatoli iha ninia servisu fatin, Dili, tersa ne’e.

Nia esplika katak totál profesór hosi nivel edukasaun pre-eskolár to’o ensinu sekundáriu jerál no tékniku vokasionál hamutuk 3.153 no dadus ne’ebé nia update katak profesór 812 maka simu ona vasina no profesór 2.341 seidauk simu vasina.

Bazeia bá dadus profesór ne’ebé nia update to’o loron 29 juñu 2021, konsidera katak profesór ne’ebé simu vasina númeru sei ki’ik (6%) kompara ho profesór ne’ebé seidauk simu vasina.

Hosi totál Edukasaun pre-eskolár eskolár hamutuk 60 ho estudante 6.096 no totál profesór 183, ne’ebé simu ona vasina 149, profesór seidauk simu vasina 34.

Nivel Eskola Ensinu Báziku totál  106, estudante 19.993,  no totál profesór 1.830, bá profesór ne’ebé simu ona vasina 233 no sira ne’ebé seidauk simu vasina 1.597.

Totál Eskola Ensinu Sekundáriu Jerál iha 22, Estudante hamutuk 24.589, no  totál profesór 863, bá profesór simu ona vasina iha 316, ne’ebé seidauk vasina 547.

Totál Eskola Ensinu Tékniku Vokasionál iha sia (9) ho Estudante hamutuk 4.065 no totál Profesór  277, nune’e profesór ne’ebé simu ona vasina  114 no 163 seidauk simu vasina.

Tuir informasaun hosi Diretór SEMD katak dadus profesór sira nian sei finaliza iha loron 10 jullu 2021, signifika atu reativa eskola iha Dili profesór sira tenke simu hotu ona vasina.

Jornalista : Tomé Amado

Editór        : Francisco Simões

HAKEREK NO HATÁN

Please enter your comment!
Please enter your name here