Treinadór U-18, Eduardo Pereira. Imajen/LFA

DILI, 28 juñu 2021 (TATOLI) – Treinadór prinsipál selesaun nasionál U-18, Eduardo Pereira, hahú fó treinamentu ba jogadór-sira  hodi hasae fila fali sira-nia prestasaun.

Eduardo Pereira hateten, durante fulan tolu selesaun nasionál ne’ebé nia lidera labele hala’o atividade tanba pandemia Covid-19 no halo jogadór barak prestasaun monu.

“Iha fulan tolu nia laran treinamentu ba jogadór sira laiha tanba pandemia global ne’e, entaun jogadór barak hela de’it iha uma la book-an hodi implika ba sira-nia prestasaun tun, entaun agora re-ativa fali ona iha treinamentu ida-ne’e bele hasae fila fali sira-nia prestasaun,” Eduardo  Pereira hateten ba Agência Tatoli iha kampu FFTL Dili, segunda ne’e.

Treinamentu ne’e hala’o durante semana rua ona, tanba hetan orientasaun hosi Federasaun Futeból Timor-Leste (FFTL).

Daudauk ne’e jogadór Selesaun Nasionál U-18 hamutuk na’in-38, hosi númeru ne’e, na’in-ualu (8) tama iha selesaun seniór nian.

Sei rezigna-an hosi AS Ponta Leste

Iha biban ne’e, Eduardo Pereira  nu’udar mós treinadór prinsipál klube AS Ponta Leste konfirma katak nia sei  rezigna-an hosi klube  AS Ponta Leste iha époka ne’e.

“Tinan ne’e, ha’u sei la hamutuk ho AS Ponta Leste hodi foku de’it ba Selesaun Nasionál U-18. , iha tempu besik ha’u sei hato’o karta ida ba Ponta Leste hodi buka fali treinadór ida troka ha’u nia fatin,” Eduardo Pereira hateten.

Eduardo hamutuk ho Ponta Leste  hahú 2014, nune’e iha 2016 treinadór ne’e susesu lori Ponta Leste sai kampiaun ba tasa 12 de Novembru no lori Ponta Leste iha joga Primeira Divizaun Liga Futeból Amadora (LFA) bainhira klube ne’e ameasa atu degrada ba Segunda Divizaun.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here