Diretora PDHJ delegasaun territoriál Baucau, Joanita Silveira da Costa. Imajen TATOLI/Natalino Belo

BAUCAU, 28 juñu 2021 (TATOLI)–Diretora Providória Direitu umanu no Justisa (PDHJ, sigla Portugés) delegasaun territoriál Baucau, Joanita Silveira da Costa, konsidera, durante ne’e autoridade lokál iha munisípiu Baucau ladún transmite regra prevensaun COVID-19 ba komunidade.

“Komunidade barak la kumpre regra sanitária durante Estadu Emerjénsia no Serka Sanitária, sira ladún uza maskara ho loloos, laiha distansiamentu fíziku no ita-nia autoridade lokál ladún uza sira-nia papel ho didi’ak hodi transmite, fahe, hatutan ba ita-nia komunidade sira kona-ba regra distansiamentu ne’e rasik,” Diretora PDHJ informa ba Agência TATOLI, iha ninia knaar fatin, segunda ne’e.

Notísia relevante: Governu mantein Serka Sanitária iha Baucau-Dili no hakotu Bobonaro-Covalima

Nia esplika, hosi monitorizasaun ne’ebé PDHJ hala’o ba komunidade Baucau, barak liu ladún tau importánsia hodi kumpre medida prevensaun COVID-19.

“Komunidade sira barak ladún kumpre, liuliu iha fatin públiku hanesan bazar, ita-nia komunidade sira nia prezensa barak la uza máskara ho loloos, la taka ibun no inus no distansiamentu laiha,” Joanita akresenta.

PDHJ Baucau hala’o servisu normál hodi monitoriza ba implentasaun regra Estadu Emerjénsia no Serka Sanitária, inklui fiskalizasaun ba servisu entidade públiku atu proteje ba violasaun direitu umanu no boa governasaun iha munisípiu haat hanesan Baucau, Lautém, Manatuto no Viqueque.

Aleinde ne’e, halo mos monitorizasaun ba distribuisaun Cesta Bázika no atendementu públiku sira hanesan movimentu transporte terrestre iha munisípiu Baucau, rejistu notariadu no servisu atendimentu públiku ba komunidade sira bainhira halo karta deslokasaun ba munisípiu seluk liuhosi Sala Situasaun, Sentru Intergradu Jestaun Krize (CIGC, sigla portugés) munisipál, atendementu iha postu saúde, ospitál inklui implentasaun kampaña vasinasaun.

Bazeia ba relatóriu monitorizasaun ne’ebé iha, PDHJ Baucau rasik direitamente hato’o ona ba nasionálliuhosi diresaun fiskalizasaun hodi haree parte ne’ebé mak tenke imediatemente liuhosi provedoria ba institusaun relevante atu foti medida.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here