Pároku Oésilo, Dominikus Leki Nahak, SVD. Imajen Tatoli/Abilio Elo Nini.

OÉ-CUSSE, 28 Juñu 2021 (TATOLI)—Pároku Oésilo, Dominikus Leki Nahak, SVD, husu ba sarani sira tau fiar ba Estadu Timor-Leste atu esforsu buka dalan, nune’e hamutuk hodi kombate COVID-19 iha Timor-Leste.

“COVID-19 ne’e ita bele haree iha mundu tomak liu-hosi televizaun, online, ema mate barak ne’e la bosok. Se iha ema ruma hateten katak COVID-19 ne’e bosok, ha’u hanoin sidadaun ne’e, nia hanoin estraga ema hotu nia fiar ba Estadu no Governu. Estadu ne’e hanoin nia povu buka dalan atu salva la’ós atu estraga povu. Ne’ebé, ita persiza fiar, labele rona ema seluk mai hobosok ita ho razaun ne’ebé la loos,” Dominikus Leki Nahak informa ba Agência Tatoli iha aldeia Usapikolen, suku Bobometo, sub-rejiaun Oésilo, segunda ne’e.

Ezemplu, nia dehan, akontesimentu iha nasaun India ne’e fó sasin ba sarani sira iha Timor-Leste atu prepara-an servisu hamutuk ho Estadu nune’e situasaun ne’e labele akontese ba Timor-Leste, entaun ema hotu tenke tau fiar ba Estadu reza ba Maromak atu tulun povu no Estadu hodi satán COVID-19 ne’e.

“Ita observa sidadaun balu tenta lansa informasaun falsa dehan COVID-19 ne’e bosok, Estadu mak manipula moras ne’e, ne’e informasaun sira-ne’ebé la-tama iha ita nia kakutak. Di’ak-liu ita rona parte Estadu, rona profisionál saúde ho liña frente sira ko’alia oinsá, ita fiar tuir sira. Tanba, sira eskola ba ida-ne’e. Duké ita ba rona informasuan laloos iha mídia sosiál sira, halo ita dalaruma lakon fiar ba dirijente sira iha nasaun ne’e. Dalaruma ita fiar ne’e halo ita-nia ulun susar atu tau fiar ba Estadu,” nia fó hanoin.

Tanba ne’e, amululik ne’e apela ba populasaun Oé-Cusse atu servisu hamutuk ho autoridade RAEOA hodi hakbesik-an ba sentru saúde no postu saúde sira hodi simu vasina, tanba Estadu oferese gratuita ba nia povu tomak.

Iha parte seluk, Jestór Sub-Rejiaun Oésilo Domingos Marques hateten sub-rejiaun Oésilo área fronteira terrestre luan tebe-tebes maibé nu’udar autoridade sempre servisu hamutuk ho xefe suku no aldeia sira, liu-liu suku Bobometo ne’ebé besik liña fronteira hanesan bairru Usapikolen, Hoineno, Saben, Tumin, Quibiselo, to’o suku Usitaqueno, atu labele halo transaksaun ilegál hodi prevene COVID-19 ne’e labele hakat liu fronteira.

Jestór Sub-Rejiaun Oésilo, Domingos Marques. Imajen Tatoli/Abilio Elo Nini.

“Ami-nia sensibilizasaun iha períodu primeiru ami sai ho karreta hamutuk ho PNTL no ekipa saúde sira komesa hosi aldeia Nianapu mai to’o iha Oésilo sentru. Depois segundu períodu ami hala’o hosi Tumin to’o suku Usitaqueno no suku Usitasae, ami fó sensibilizasaun ba komunidade atu prevene-an labele hakat liu fronteira. Ami aviza mós atu simu vasina no tenke kumpre protokolu saúde nian hodi uza máskara, fase liman ho sabaun no distánsia sosiál iha merkadu tardisionál sira,” nia hateten.

Iha sub-rejiaun Oésilo garantidu laiha problema maske fronteira entre Timor-Leste ho Kefamenanu (Nusa Tenggara Timur, NTT) kuaze metru 100, maibe komunidade parte ida-idak hakmatek iha sira-nia fatin. Tanba, durante ne’e komunidade koopera di’ak ho autoridade lokál sira ho parte seguransa hanesan UPF, PNTL no ekipa saúde sira iha sub-rejiaun atu labele halo atividade illegál.

Entretantu, dadus sensu populasaun tinan 2015 hatudu katak, totál populasaun iha sub-rejiaun Oésilo hamutuk 11.481 ho uma kain 2.538, kompostu hosi suku tolu hanesan suku Bobometo iha aldeia sia (9) mak hanesan aldeia Quibiselo, Tumin, Nonquican, Nianapu, Oébaha, Oénoah, Usapikolen, saben, no aldeia Hoineno ho totál uma kain 1.585, suku Usitasae iha aldeia tolu (3) hanesan aldeia Sifin, Pune no aldeia Buqui ho totál uma kain 737 no suku Usitaqueno aldeia (1) mak aldeia Nibin ho totál uma kain 216.

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here