Prezidente Autoridade RAEOA, Arsénio Paixão Bano, lansa primeira pedra ba gabiaun (gabiões) ho naruk metru 100 iha natar Bilulu. Imajen Tatoli/Abilio Elo Nini.

OÉ-CUSSE, 28 Juñu 2021 (TATOLI)–Prezidente Autoridade Rejiaun Administrátivu Espesiál Oé-Cusse Ambeno (RAEOA), Arsénio Paixão Bano, segunda ne’e ofisiálmente lansa primeira pedra ba gabiaun (gabiões) ho naruk metru 100 iha natar Bilulu, suku Cunha, sub-rejiaun Pante Makasar

Gabiaun (gabiões) ho naruk metru 100 iha natar Bilulu. Imajen Tatoli/Abilio Elo Nini.

“Tuir loloos, bronjong ka gabiaun ne’e finaliza ona maibé iha fulan abríl ita hetan inundasaun mota sobu imi-nia natar sira, entaun ita adianta to’o ohin ita halo lansamentu. Tanba ne’e, ita agradese ba Sekretáriu Agríkultura tanba iha inisíativa hatama proposta ba autoridade, ohin ita lansa. Autoridade lakohi komunidade terus demais tanba imi-nia natar persiza tebes atu imi bele servisu ho seguru hosi dezastre,” Arsénio Paixão Bano hato’o lia hirak ne’e iha serimónia lansamentu primeira pedra ba gabiaun iha natar Bilulu, segunda ne’e.

Maske natar-na’in sira-nia pedidu persiza de’it metru 100 maibé autoridade RAEOA iha obrigasaun atu aumenta tan to’o metru 200. Konstrusaun gabiaun ne’e komunidade mak sei servisu rasik, entaun autoridade apoiu ho hahan hanesan foos atu tulun servisu na’in sira bele finaliza iha tempu badak nia laran.

Iha fatin hanesan, Sekretáriu Rejionál Asuntu Agríkultura, José Eta hateten tanba natar Bilulu hetan estragu beibeik hosi bee-mota entaun komunidade liuhosi xefe Suku Cunha aprezenta pedidu apoiu konstrusaun gabiaun ba Dirasaun Rejionál Agríkultura hafoin submete ba Autoridade RAREOA no aprova.

“Antes ne’e ami lori sasán sira mai natar, maibe akontese-tan siklone Tropikal seroja iha 4 apríl foin lalais ne’e, entaun materiál sira-ne’e ita pendente. Foin daudaun agrikultór natar kolleta haree, no ohin ita mai entrega no halo lansamentu, nune’e komunidade bele servisu ona. Autoridade apoiu kona-bá ekipamentu eskavatór nomós alimentasaun tanba komunidade mak kaer servisu rasik,” nia hateten.

Entretantu Xefe Suku Cunha, Domingos Seco Caunan, hato’o agradese ba autoridade RAEOA tanba tulun no salva natar iha Bilulu ektare sia (9) maibé ektare lima (5) hetan ona estragu iha dezastre naturál ne’ebé akontese foin lalais ne’e.

Prezidente Autoridade RAEOA, Arsénio Paixão Bano, hasai retratu hamutuk ho komunidade sira hafoin lansa lansa primeira pedra ba gabiaun (gabiões) ho iha natar Bilulu. Imajen Tatoli/Abilio Elo Nini.

“Natar iha Bilulu ne’e hetan estragu hamutuk ektare lima (5). Tanba ho apoiu sira-ne’e, ami agradese ba autoridade RAEOA. Ami sei tau matan nafatin hodi bele satán netik komunidade sira-nia natar hanesan gabiaun no seluk tán. Komunidade sira apresia no hakarak sira mak kaer servisu, importante apoiu ekipamentu para kee-rai, ba servisu seluk komunidade prontu,” líder komunitária ne’e hateten.

Entretantu, apoiu ne’ebé Autoridade RAEOA ba konstrusaun gabiaun ne’e hamutuk rihun $8 hodi bele hola Gabiaun ho arame, kombustivél ba kareta lalin fatuk inklui eskavatór ida. Kona-bá alimentasau nian, apoiu hosi Sekretáriu Rejionál Asuntu Edukasaun no Solidariedade Sosiál hamutuk foos saka 104.

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here