Ministru Transporte Komunikasaun, José Agostinho da Silva. Imajen TATOLI/Egas Cristóvão

DILI, 28 juñu 2021 (TATOLI)–Ministériu Transporte no Komunikasaun (MTK), José Agustinho da Silva, hateten, ró-ahi KMP Tranship II daudaun ne’e halo hela movimentu bá-mai Dili-Oé-cusse-Ataúro.

“Tuir dadus ne’ebé iha, ró-ahi ne’e halo movimentu Dili-Ataúro dala-haat ona no Dili-Oé-cusse mós nia bá ona. Atu dehan katak operasaun ba ró-ahi Tranship ne’e la’o normál hela,” Ministru José Agustinho da Silva, hateten iha Palásiu Governu, segunda ne’e.

Governu kontrata ró ne’e hodi fasilita movimentu via marítima tanba ró-ahi Success sei ba halo manutensaun no renova dokumentu lisensa, enkuantu ró-ahi Berlin Nakroma avaria desde tinan 2020.

Ba kestaun ne’e, Ministru kontinua defende katak ró ne’e ninia kondisaun di’ak tanba relatóriu hosi Diresaun Nasionál Transporte Marítima ne’ebé maka lei atribui kompeténsia ba sira halo inspesaun, hatudu katak ró ne’e bele halo movimentu.

Notísia relevante: MTK husu tékniku submete relatóriu ofisiál Tranship II ho loloos

Ró-hi KMP Tranship II hosi Surabaya, Indonézia to’o iha Dili no atraka iha portu Dili iha loron 25 maiu, hodi subtitui ró-ahi Berlin Nakroma no Success, ne’ebé atu halo manutensaun.

Governu liuhosi MTK halo kontratu ho kompañia estranjeiru hosi Indónezia hodi bele opera ró-ahi ne’e iha Timor-Leste, ne’ebé operasaun semana ida dala-ida, iha segunda ho distinasaun Oé-cusse-Dili-Ataúro no Dili-Oé-cusse-Ataúro.

Kontratu ho kompañia estranjeiru ne’e ba kada fulan $220.000, ho ninia kapasidade tula pasajeiru hamutuk na’in-300 inklui sasán ho kapasidade tonelada 1.000-resin.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here