Konstrusaun laboratóriu COVID-19, iha Ospitál Referál Maliana, segunda (28/06/21). Imajen Tatoli/Sérgio da Cruz.

BOBONARO, 28 juñu 2021 (TATOLI)—Konstrusaun foun ba laboratóriu COVID-19 iha Ospitál Referál Maliana (HRM sígla portugés), postu administrativu Maliana, munisípiu Bobonaro, atinje ona 58%.

“Progresu serbisu ne’e atinje ona 58%, tama ona ba faze fui rin, hein katak loron rua tan bele halo pengecoran hotu, nune’e loron tuir-mai bele atinje 65% no ami bele monta ona Kuda-kuda,” Enjeñeiru hosi kompañia K-6, Mariano Rama Maia, hateten ba jornalista Agência Tatoli, iha Ospitál Referál Maliana, segunda ne’e.

Notísia relevante:MS enkoraza pesoál saúde Bobonaro kombate TBC, malária no HIV

Enjeñeiru ne’e rekoñese katak, konstrusaun ne’e atrazu oitoan durante fulan rua tanba  situasaun COVID-19 no materiál konstrusaun hotu-hotu bazeia ba kontratu kompaña K-6 tenke sosa iha Toko-Lay, Rofater no Dyna Pateo, tuir padraun Ajénsia Dezenvolvimentu Nasionál (AND) no Ministériu Saúde (MS).

“03 maiu mak foin hahú konstrusaun no problema bo’ot ne’ebé ami hasoru maka, materiál hotu-hotu tenke ba sosa iha Dili, entaun situasaun Loock down ami labele kontinua tanba dalan taka,” nia hateten.

Tuir kontratu, obra ne’e tenke entrega ona iha fulan marsu, maibé la konsege tanba situasaun COVID-19, nune’e kompañia husu estensaun ba segunda faze to’o fulan jullu, no tuir planu sei entrega iha agostu.

Laboratóriu ne’e ho medida luan metru ualu no naruk metru 10 konstrui hosi kompañia lokál K-6 unipesoal Lda, ne’ebé lansa fatuk dahuluk iha 28 janeiru, ho orsamentu $79.154,75.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here