Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál, Lere Anan Timur hasoru-malu ho Kay Rala Xanana Gusmao iha izolamentu Vera Cruz (13/04/21). Imajen Tatoli/António Gonçalves.

DILI, 28 juñu 2021 (TATOLI)—Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál, Lere Anan Timur, seidauk bele sai hosi militár atu kandidata-an ba Prezidente Repúblika (PR) periúdu 2022-2026, tanba seidauk rona mensajen hosi Komandante Em Xefe das FALINTIL, Kay Rala Xanana Gusmão.

“Ha’u to’o agora seidauk deklara kandidata-an, tanba ha’u sei militár. Ha’u sei rona ha’u-nia maun ne’ebé ami mai hosi ai-laran, nu’udár maun alin sei konsulta malu, liu-liu maun Xanana,” Lere Anan Timur hateten ba jornalista-sira liuhosi konferénsia imprensa, iha Kuartél Jenerál F-FDTL, Fatuhada, segunda ne’e.

Notísia relevante:Embaixadór UE no PM diskute preparasaun Eleisaun Prezidensiál tinan 2022

Veteranu ne’e deklara katak, bainhira rona ona informasaun pozitivu hosi Xanana Gusmão, mak bele deside rezigna-an hosi instituisaun F-FDTL, hodi avansa ba kandidatura.

“Se ha’u kandida-an karik, ha’u sei konsulta ho FRETILIN ka ba independente, ne’e ita sei haree,” Lere Anan Timur subliña.

Lere Anan Timur mós rekoñese katak, atu kandidata-an ba Prezidente Repúblika nu’udár aktu demokrasia iha Timor-Leste, no bainhira sidadaun ida hakarak kandidata-an tenki iha obra no programa ba nasaun ne’ebé presija halo debate ho kandidatu seluk.

Antes ne’e, partidu Kmanek Haburas Unidade Nasionál Timor Oan (KHUNTO) deklara ofisialmente atu avansa ba eleisaun Prezidensiál periúdu 2022-2026 ho kandidatu rasik maka atuál Vise Primeira Ministra no Ministra Solidariedade Sosiál no Inkluzaun (MSSI), Armanda Berta dos Santos.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here