Komandante Polísia Nasionál Timor-Leste munisípiu Baucau, Superintendente Xefe Armando Monteiro. Imajen TATOLI/Natalino Belo

BAUCAU, 28 juñu 2021 (TATOLI)–Komandante Polísia Nasionál Timor-Leste (PNTL) munisípiu Baucau, Superintendente Xefe Armando Monteiro, hateten, durante fulan neen tinan ne’e rejista kazu hamutuk 86, asidente no insidente tránzitu hamutuk 29 hodi rezulta ema ida lakon vida.

“Komandu PNTL munisípiu Baucau hahú hosi janeiru to’o juñu tinan 2021 rejista kazu hamutuk 86, ne’ebé hosi númeru ne’e, a’as liu mak ofensa integridade fízika simples, tuir mai mak violénsia doméstika, kombinasaun kazu sivíl no problema disputa rai, inklui fahe eransa,” Komandante Polísia munisípiu Baucau, informa, iha ninia knaar fatin, villa nova, Baucau segunda ne’e.

Enkuantu, asidente no insidente tránzitu, PNTL Baucau rejista kazu hamutuk 29 no hosi kazu refere rezulta vítima ida lakon vida iha loron 04 abríl bainhira inundasaun akontese iha postu Baguia, no restu kanek kaman.

“Fatál ida mak bainhira loron 04 abríl, dezastre afeta ba ita-nia nasaun iha Baguia komunidade tula sasán nesesidade bázika hosi Dili bá Baguia, hafoin ponte tohar hanehan kareta ho sasán hodi rezultada komunidade ida mate,” Armando esplika.

Aleinde ne’e, PNTL Baucau koopera ho Komponente terrestre FALINTIL-Forsa Defeza Timor-Leste (F-FDTL) liuhosi Servisu Komandu Konjunta Operasaun Koordenada (SKKOK) hodi destaka membru sira iha postu vijilánsia postu admistrativu Vemasse no Laleia, munisípiu Mantuto.

Nune’e mós, destaka sesaun ida hamutuk ho F-FDTL no Sala Situasaun Sentru Integradu Jestaun Krize (CIGC, sigla portugés), ne’ebé estabelese mós postu vijilánsia iha Mulia, Laisorulai, Quelicai inklui Namanei.

“Oinsá atu haree movimentu komunidade tamba Quelicai nia área luan tebes, entaun aumenta tan postu haat hodi kontrolu,” nia akresenta.

Kona-ba Ofisial Polísia Suku (OPS) nafatin serbisu hamutuk ho autoridade suku hodi halo asisténsia, seguransa inklui sosializa programa Governu iha nível suku hanesan implentasaun hosi Programa Nasionál Dezenvolvementu Suku (PNDS), ba Uma Kbiit Laek no pagamentu idozu.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here