Diretora PDHJ delegasaun territoriál Baucau, Joanita Silveira da Costa. Imajen TATOLI/Natalino Belo

BAUCAU, 28 juñu 2021 (TATOLI)–Diretora Provizória Direitu Umanu no Justisa (PDHJ, sigla Portugés) delegasaun territórial  Baucau, Joanita Silveira da Costa, informa, inísiu fulan-janeiru to’o juñu 2021 rejista ona keixa hosi komunidade hamutuk 14.

“Keixa hosi munisípiu Baucau, Manatuto, Lautém no Viqueque hamutuk 14 no hosi keixa hirak ne’e iha violasaun boa governasaun hamutuk hotu no violasaun direitu umanu hitu,” Diretora PDHJ Baucau hateten ba Agência TATOLI, iha ninia knaar fatin, segunda ne’e.

Keixa sira ne’e hasoru entidade publika sira hanesan membru Polísia Nasionál Timor-Leste (PNTL), funsionáriu públiku, líder Komunitáriu inklui institusaun relevante seluk liuhosi munisípiu Baucau hamutuk 11, Lautém ida no Viqueque rua.

PDHJ Baucau normalmente hafoin simu keixa hosi komunidade, direitamente haruka ba diresaun asisténsia públika iha nasionál, hafoin kontinua hatama iha sistema keys management system durante loron 10, no PDHJ antes ne’e notifika dahuluk ba komunidade sira ne’ebé hato’o keixa refere.

Diresaun asisténsia publika sei submete fali ba diresaun investigasaun, hafoin ofisiál investigadór sira halo avaliasaun primeniáriu no sei kontinua iha komité jestaun keixa, kompostu hosi providór, ajuntu, diretór asisténsia públika no diretór investigasaun.

“Karik keixa sira vale iha indísiu krime violasaun direitu umanu nian, entaun PDHJ loke, signifika tama ba mandadu provedoria nian hodi halo investigasaun kontinuasaun. Enkuantu refere ba krime sei haruka ba Ministériu Públiku hodi haree ba krime nian,” Joanita akresenta.

Bainhira indísiu violasaun direitu umanu no violasaun boa governasaun, entaun PDHJ iha dever notifika daruak ba keixa na’in sira katak keixa sai ona ba kazu nia prosesu kontinua.

PDHJ Baucau tuir nia kompeténsia simu de’it keixa, enkuantu prosesu hosi keixa hamutuk 14 daudaun ne’e parte investigasaun nasionál mak responsabiliza.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here