Edifísiu Ensinu Bázika Sentrál (EBC, sigla portugés) 9 de Setembru Tumin. Imajen Tatoli/Abilio Elo Nini.

OÉ-CUSSE, 28 Juñu 2021 (TATOLI)—Diretór Ensinu Bázika Sentrál (EBC, sigla portugés) 9 de Setembru, João Bosco Elo, informa katak kooperasaun entre inan-aman hosi estudante servisu hamutuk ho profesór sira hadi’a mobiliáriu eskola nian hanesan meja, kadeira inklui halo lutu hale’u eskola.

Diretór Ensinu Bázika Sentrál (EBC, sigla portugés) 9 de Setembru Tumin, João Bosco Elo. Imajen Tatoli/Abilio Elo Nini.

“Problema ne’ebé ami hasoru primeiru mak eskola la seguru tanba lutu laiha. Depois kampu volleyball joven sira-nian besik kedas eskola, bainhira sira halimar dalaruma bola halai tama to’o sala laran halo prosesu aprendizajen la’o la másimu. Entaun, ha’u foti desizaun aviza ba inan- aman sira kontribui halo lutu haleu eskola no agora sente seguru ona,” João Bosco Elo, informa ba Agênsia TATOLIm iha EBC Tumin, suku Bobometo, sub-rejiaun Oésilo segunda ne’e.

Nia informa, kadeira no meja iha EBC 9 de Setembro kompletu ona no balun mak aat maibe iha tempu estrakurikulár iha loron sabadu, estudante nia inan-aman sira mai hamutuk ho profesór sira hadia tiha balun, nune’e bele utiliza ba prosesu ensinu aprendizajen.

Aleinde hadi’a mabiliáriu, nia dehan, eskola ne’e menus ba bee-moos entaun daudaun ne’e estudante sira mak fó apoiu hodi kuru bee jerigen ida hosi uma hodi ense ba tanke bee nian tanba bee ne’ebé dada hosi aldeia Quibiselo ne’e ninia kanu tohat ka aat hotu.

“Agora tanba COVID-19, ami haruka estudante sira lori bee-moos jerigen ida hosi uma mai ense iha tanke mak foin transfere fali ba fatin fase liman nian no balun ense ba tanke haris fatin nian. Labarik sira tenke uza bee hodi fase liman tanba ida-ne’e parte ida hodi medida prevene-an no kombare COVID-19,” nia hateten.

Entretantu, eskola Ensinu Bázika Sentrál (EBC, sigla portugés) 9 de Setembru ne’e, halo prosesu aprendizajen ne’e estudante hosi primeiru no segundu siklu hosi primeiru ano to’o terseiru no kuatru ano ne’e tama dadeer, hafoin estudante terseiru siklu mak kintu no sestu ano tama lorokraik.

Totál estudante sira iha Ensinu Bázika Sentrál (EBC, sigla portugés) 9 de Setembru ne’e totál hamutuk 501, totál sala-de-aula hamutuk sia (9) no totál profeór sira hamutuk na’in-16 ne’ebé kompostu hosi profesór permanente na’in ualu (8), kontratu na’in-neen (6), voluntáriu na’in-rua  (2) no seguransa na’in-ida (1).

Jornalista : Abilio Elo Nini

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here