Jestór Sala Leitura Xanana Gusmão (SLXG), Gaspar Quintino Freitas. Imajen Tatoli/Nelia Fernandes.

DILI28 juñu 2021 (TATOLI)—Jestór Sala Leitura Xanana Gusmão (SLXG), Gaspar Quintino Freitas, hateten maske sei situaasaun pandemia COVID-19 maibé bainhira Governu hakotu ona serka sanitária (SS) mak SLXG sei reativa fali formasaun ba juventude no labarik sira.

Notísia Relevante: UNESCO apoia rihun $20 ba Sala Leitura Xanana Gusmão instala katálogu dijitál

“Ami seida’uk bele reativa formasaun ne’e, tanbá restrisaun ba COVID-19. Ami-nia planu iha ona, maibé ami hein Governu hakotu ona regra serka sanitária entaun ami mós bele komesa fali formasaun ne’e,” Gaspar Quintino Freitas, hateten ba Agência Tatoli, iha  Lecidere, Dili, segunda ne’e.

SLXG depende no obedese ba Governu nia desizaun tanba bainhira Ministru Edukasaun Juventude no Desportu (MEJD) deside katak iha fulan-jullu atu reativa ensinu aprendizajen iha eskola sira, entaun SLXG tenke kumpre nafatin regra protokolu ministériu saúde nian hodi fase liman, uza máskara no distansiamentu sosiál.

“Iha ne’e, ami fó formasaun iha lian inglés, portugués, administrasaun finansa, komputadór, tékniku hanesan AutoCad. Ami hanoin katak importante duni atu oferese oportunidade ba joven sira hamri’ik iha oin atu sira bele sai joven ne’ebé util ba sira-nia maluk seluk,” nia dehan.

Formasaun ne’e la uza formatu formasaun formál maibé formasaun ne’e kria kondisaun, atu nafatin hala’o misaun oinsá joven sira bele mai buka matenek no fahe nia matenek ba ema seluk. Tanba, vizaun no misaun formasaun ne’e oinsá juventude sira bele iha kbi’it rasik atu jere sira-nia moris liuhosi formasaun no asesu ba rekursu edukativu sira.

Nia informa, iha tinan 2021, dadus formandu sira-ne’ebé tuir kursu no atividade edukativu hamutuk 377 kompostu hosi mane 234 (62%) no feto na’in-134 (38%). Enkuantu, iha tinan 2020, joven sira-ne’ebé mai tuir ona iha formasaun ne’e hamutuk 4.689 kompostu hosi mane 2.264 (48%) no feto na’in-2.425 (52%).

Aleinde ne’e, totál labarik sira-ne’ebé partisipa iha kursu ne’e hamutuk 948, kompostu hosi feto 586 (62%) no mane 362 (38%). Formadór ba labarik sira-ne’e, Sala Leitura Xanana Gusmão koopera ho grupu joven sira hodi oferese fali kursu ba labarik sira-ne’e.

“Iha ne’e, ita fó kursu ba labarik sira-ne’e mak kursu lian Inglés no portugés. Kursu ne’e komesa iha fulan janeiru maibé to’o fevereiru suspende tiha atividade ne’e tanbá Governu implementa serka sanitária no konfinamentu obrigatóriu,” nia informa.

Sala Leitura Xanana Gusmão, funda hosi Kirsty Sword Gusmão iha tinan 2000. Iha biban ne’e, hahú loke biblioteka hodi halo kolesaun livru hosi Kirsty Sword Gusmão ho Xanana Gusmão nian hodi tau iha biblioteka ne’e, no fó espasu ba joven sira atu aprende komputadór iha momentu ne’ebá.

Iha tempu tuir mai, Sala Leitura Xanana Gusmão kria fali progama ida, oinsá atu bele enkoraja partisipasaun joven sira atu hala’o programa. Joven sira- harii grupu hanaran Youth Community Care, foku ba área saúde no ambiéntal no grupu joven ba amizade ne’e atu kapasita joven sira hanesan halo semináriu no debate sira.

Iha fatin ne’e oferese oportunidade ba joven sira atu hala’o esperiénsia oinsá sai treinadór, entaun kria oportunidade ba sira atu oferese sala-de-aula, organiza sira-nia oráriu no organiza atu halo kursu iha área ne’ebé sira sente bele atu fahe fali ba ema seluk.

Entretantu, totál funsionáriu iha Sala Leitura Xanana Gusmão hamutuk na’in-sia (9) ne’ebé kompostu hosi kontratadu na’in-lima (5) no voluntáriu na’in-haat (4).

Jornalista : Nelia Fernandes 

Editór      : Cancio Ximenes

HAKEREK NO HATÁN

Please enter your comment!
Please enter your name here