Primeiru-Ministru, Taur Matan Ruak, prezide reuniaun kona-ba infraestruturas portuáriu marítima no manutensaun ró-ahi, iha Palásiu Governu, segunda (28/06). Imajen TATOLI/Egas Cristóvão

DILI, 28 juñu 2021 (TATOLI)–Governu liuhosi Ministériu Transporte no Komunikasaun (MTK), Ministériu Defeza (MD), Ministériu Interiór (MI) no Sekretaria Estadu Peska (SEP), hamutuk ho Primeiru-Ministru (PM), Taur Matan Ruak, halo diskusaun ba infraestrutura portuária no manutensaun ró-ahi sira.

“Asuntu rua mak ami halo diskusaun hamutuk, hanesan kria kondisaun ba manutensaun ró-ahi, tanba durante ne’e iha ró-ahi pasajeiru no Governu investe sosa ró-ahi maibé ninia manutesaun sai preokupasaun, kada tinan Ministériu Transporte no Komunikasaun ró-ahi sira ne’ebé tula pasajeiru no tula kargu kada tenke halo manutensaun,” Ministru Transporte no Komunikasaun, José Agustinho da Silva, relata ba jornalista sira hafoin ramata reuniaun ho Xefe Governu, iha Palásiu Governu, segunda ne’e.

Tanba ne’e, Governu iha hanoin kria kondisaun iha rai-laran, halo estaleiru (fatin hadi’a ró-ahi), nune’e ró bele halo manutensaun iha rai-laran.

Ministru dehan, kona-ba infraestrutura portuária, liuliu ba portu sira ne’ebé mak iha ona, daudaun Governu haree ba ninia funsionamentu iha futuru, hadi’a portu sira ho ninia kondisaun atubele uza ba nesesidade movimentu marítima.

Liuhosi reuniaun ne’e iha hanoin no konseitu hodi halo ba asaun no kada ministériu labele halo ketak, nune’e evita duplikasaun.

Aleinde ne’e, PM orienta Ministru José Agustinho da Silva atu akompaña nafatin apoia hosi Governu Alemaña bá Timor-Leste iha ámbitu estabelese estaleiru ba manutensaun ró sira iha Timór.

Notísia relevante: Ró Berlin-Ramelau tama tasi laran ba dahuluk iha Xina

“Primeiru-Ministru husu atu koordena ho ministériu relevante, tanba antes ne’e Governu Alemaña apoiu orsamentu kontra partida, ne’ebé hanesan polítika Governu rua halo konstrusaun ba ró-ahi Berlin Ramelau, ne’ebé tuir planu sei to’o iha Timór iha fulan-setembru tinan ne’e,” nia akresenta.

Governante subliña, durante ne’e Governu Alemaña mós apoia formasaun ba timor-oan sira, halo kapasitasaun rekursu umanu no fó apoia aselera instrumentu legál sira, liuliu liga ba konvensaun sira.

“Sira mós durante ne’e planeia fó apoia atu kria kondisaun estaleiru hodi halo manutensaun bar ró-ahi. Tanba ne’e, Primeiru-Ministru alerta mai ha’u atubele konfirma fali ho Governu Alemaña, ba apoia sira ne’e,” nia hatutan.

Jornalista : Antónia Gusmão

Editora     : Julia Chatarina

1 KOMENTÁRIU

HAKEREK NO HATÁN

Please enter your comment!
Please enter your name here