Otél Villa-Verde Dili. Imajen/TATOLI.

DILI, 28 juñu 2021 (TATOLI)—Governu liu hosi Ministériu Saúde (MS), kontrata kompañia hamutuk sia ne’ebé durante ne’e fornese hela hahán ba izolamentu no kuarentena hamutuk 27 iha Dili laran.

Tanba ne’e, parte Diresaun Nasionál Aprovizionamentu sei halo pagamentu ba kompañia hirak-ne’e ho orsamentu ne’ebé prepara ona hamutuk millaun $1-resin.

Notísia relevante:Governu kontrata otél ba izolamentu ho kustu diferente

“Ita sei halo pagamentu ba kompañia sia ne’e ho orsamentu hamutuk millaun $1-resin,’’ Diretór Nasionál Aprovizionamentu, Nelson Guterres Castro, hateten ba jornalista Agência Tatoli, iha Caicoli, segunda ne’e.

Kompañia sia ne’e mak hanesan, kompañia Reginaldo Unip Lda, Roof Casa Musika Unip Lda, Kaimaleria Unip Lda, Helfia Unip Lda, Felicya Queen Unip Lda, Filomeno Merita Unip Lda, Sara Unip Lda, Montez Frere Unip Lda no Novu Tropical Restaurante Unip Lda.

Oras-ne’e daudaun, Ministériu Saúde halo ona pagamentu parsiál ba kompañia rua no sira seluk sei iha faze verifikasaun dokumentu.

To’o oras-ne’e Governu kontrata no utiliza otél ho edifísiu públiku hamutuk 27 iha Dili ba sala izolamentu no kuarentena COVID-19.

Hosi númeru ne’e, otél no edifísiu públiku ne’ebé Governu utiliza ba izolamentu hamutuk 12 mak hanesan otél Fortuna, Novo Horizonte, Luz Clarita, otél SK, otél Vila Verde, otél Leokase, otél D’City, Apartament Eternity, koléjiu akademia polísia Comoro, Palásiu Nobre Lahane, Tasi-tolu no Tibar.

Kona-bá kuarentena iha 15 mak hanesan, otél Carla Mension, otél Colmera, otél YQ, otél Funan Buras, otél Dili, otél Timing,  otél Luxury, otél Audian, otél Fantija, INAP, uma aluga Madre Salesiana Comoro, otél Chongti, otél Timor foun hudi-laran, Regal Apartament no otél Time Square.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here