Koordenadór Jerál Expo Dubai, Manel Vong, hala’o aprezentasaun ba estrutura CAC, kona-bá preparasaun no objetivu, iha Faról, segunda (28/06). Imajen Tatoli/Francisco Sony.

DILI, 28 juñu 2021 (TATOLI)—Komisaun Anti Korrupsaun (CAC sígla portugés), husu Autoridade  Nasionál ba Expo Dubai Timor-Leste (ANE-TL), atu utiliza orsamentu ne’ebé prevee ona  ba atividade ne’e ho kuidadu.

Komisáriu CAC, Sérgio Hornai husu ne’e, bainhira Koordenador Jerál ANE-TL, Manuel Vong halo aprezentasaun kona-bá programa no atividade ne’ebé TL sei aprezenta iha expo Dubai.

Notísia relevante:PM defende partisipasaun iha Expo Dubai tanba investe tempu-rekursu

Sérgio Hornai, konsidera aprezentasaun ne’e importante tanba CAC bele iha koñesimentu atu akompaña hosi inísiu liuhosi Medida Prevensaun, hodi hatene atividade ne’e ninia objetivu no retornu polítika, ekonómika ba Estadu TL.

“Husu autoridade ne’e atu ho responsabilidade no jere ho di’ak bainhira ka’er osan ne’ebé atribui ona,’’ Sérgio Hornai, hateten ba jornalista-sira iha edifísiu CAC, Faról, segunda ne’e.

Ho koordenasaun instituisionál, CAC no entidade ba  implementasaun atu bele hatene partisipasaun TL iha expo ne’e, nu’udár dezisaun estratéjiku Governu-nian.

CAC nia preferénsia atu partisipa iha atividade ne’e, haree ba sirkunstánsia hotu-hotu iha situasaun pandemia, ekonomia, polítika no oinsá hametin relasaun iha nível ho rai sira seluk.

Tanba ne’e, Sérgio Hornai, dehan presiza  haree ba implementasaun-sira ho experiénsia anteriór balun bainhira iha relevánsia atu hadi’a liu-tán.

CAC sei akompaña prosesu utilizasaun orsamentu ne’ebé prevee ona hodi hala’o atividade-sira ho transparánsia no akuntável.

Nune’e mós Koordenadór Jerál ANE-TL, Manuel Vong, aprezenta ba CAC kona-bá programa no atividade ne’ebé sei hala’o iha Expo Dubai ho preparasaun-sira iha faze tolu mak hanesan, pré expo, expo no post expo.

Faze pré expo, Komisaun halo konsultasaun ho instituisaun públiku no setór privadu hamutuk 100-resin, hosi ne’e analiza dadus hodi bele define duni prioridade partisipasaun TL iha expo Dubai, ne’ebé iha área haat atu promove hanesan turizmu no ospitalidade, agrikultura peskas, petróliu minerais no transporte lojístika ho infraestrutura.

Atividade preparasaun TL ba Expo Dubai finansia hosi Orsamentu Jerál Estadu (OJE) 2021 ho totál millaun $1-resin (30%) no millaun $2-resin ne’ebé ekivalente (70%) hanesan apoiu hosi li’ur, hosi nasaun Uni Emirat Árabe.

Espozisaun ne’e sei realiza iha 01 outubru 2021 to’o marsu 2022, ne’ebé partisipa hosi nasaun 196.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here