Ministériu Negósiu Estranjeiru no Kooperasaun (MNEK) realiza formasaun ba embaixadór dezignadu na’in-13 iha salaun MNEK, segunda (28/06). Imajen Tatoli/Francisco Sony

DILI, 28 juñu 2021 (TATOLI) –Ministériu  Negósiu Estranjeiru no Kooperasaun (MNEK) liuhosi Institutu Estadus Diplomátiku fasilita  formasaun ba embaixadór dizignadu na’in-13 no enviadu espesiál na’in ida (1) molok dezloka ba nasaun sira ne’ebé sira atu hala’o knar ba.

Formasaun ne’e ho durasaun semana ida, hahú segunda  to’o tersa (28/06-06/07/2021), nu’udar meiu ida atu fó hatene prioridade Governu nian ne’ebé mak embaixadór-sira tenke implementa iha sira-nia fatin ida-idak.

Ministra MNEK, Adalzija Albertina Xavier Reis Magno, hateten ba jornalista-sira iha edifísiu MNEK, Dili, katak prioridade prinsipál ne’ebé sei hato’o ba embaixadór-sira malok arranka mak daudauk ne’e mundu tomak, inklui Timor-Leste hasoru hela pandemia Covid-19 hodi hala’o ekonomia nasaun nian monu. Nune’e, oinsá embaixadór-sira nia aprosimasaun ba nasaun sira ne’ebé sira hala’o servisu ba hodi lori investor sira mai investe iha Timor-Leste.

Embaixadór-sira mós sei hala’o servisu tuir prioridade sira hatuur ona iha Planu Estratéjiku Dezenvolvimentu Nasionál (PEDN) hanesan oinsá mak Timor-Leste ativu liu iha área multilateral.

Embaixadór  na’in-13 ne’e kompostu hosi embaixadóra na’in-haat (4)  no embaixadór na’in-sia (9) ne’ebé sei hala’o knar iha nasaun sira hanesan, Jenebra, Indonézia, Nova Yorke, Korea Súl, Tailándia, Nova Zelándia, Vietname, Brunei Darussalam, Myanmar, Mozambique no seluk tan.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here