Ró-ahi KMP Tranship II atu atraka iha Portu Dili, sábadu (12/06). Imajen TATOLI/Antónia Gusmão.

DILI, 28 juñu 2021 (TATOLI)—Bankada Frente Revolusionária Timor-Leste Independente (FRETILIN) husu Governu liuhosi Ministériu Transporte no Komunikasaun (MTK) tenke haree didi’ak kondisaun ró-ahi Tranship II molok hala’o operasaun entre Dili-Atauro no Rejiaun Administrativa Espesiál Oé-Cusse Ambeno (RAEOA).

Notísia Relevante: PN bele halo interpelasaun ba Governu kona-ba ró-ahi Tranship II

Membru PN hosi Bankada FRETILIN, Antoninho Bianco. Imajen/ Egas Cristovao

“Ha’u hanoin kondisaun ró ne’e tenke haree. Se ró ba beibeik mak problema hanesan ne’e tenke buka dalan, labele husik ema mate. Ministru ne’ebé toma konta ne’e tenke responsabiliza. Ha’u hanesan reprezentante povu hakarak proteje povu, nune’e povu labele mate tanba kondisaun ró ne’e,” Deputadu Bankada FRETILIN Antoninho Bianco, levanta liuhosi plenária, segunda ne’e.

Reprezentante Povu ne’e husu ministériu relevante tenke halo inspesaun didi’ak ba kondisaun Ró Tranship II.

Ministru tenke responsabiliza tanba buat ne’e ameasa ema-nia vida no bainhira kondisaun ladi’ak ne’e tenke dehan ladi’ak, tanba FRETILIN mai viabiliza maibé la’ós viabiliza buat-ne’ebé laloos. 

Entretantu, Deputadu Bankada Congresso Nacional de Reconstrução de Timorense (CNRT), Ricardo Baptista, hateten foin lalais ne’e ró refere hala’o operasaun ba Ataúro maibé hatun de’it karreta mós ladi’ak.

“Povu sira iha Ataúro mak hatete mai katak iha semana kotuk (kuarta-feira) labele hatun karreta ba rai-maran. Foin lalais, sábadu ne’e, akontese tán ró ne’e atu sai tán ba rai-maran, sorte ró ne’e la travesa. Governu dehan buat hotu-hotu di’ak maibé hatun karreta ladi’ak ne’e problema. Se akontese ema ruma mate, ita foin mak dehan ne’e problema no ne’e sériu,” nia afirma.

Tuir informasaun ne’ebé Bankada CNRT rekolla iha 18 fevereiru 2021 katak foufoun deside kontratu rihun $150 ba ró refere, maibé derrepente folin aluga ró-ahi Tranship II ne’e sa’e ba rihun $220.

Entretantu, Komisaun Antí Korrupsaun (CAC-sigla portugés) lideradu Sérgio Hornai, hato’o ona notísia krime kona-ba ró refere ba Ministériu Públiku.

Hatán ba kestaun ne’e, Ministru ba Asuntu Parlamentár no Komunikasaun Sosiál, Francisco Jerónimo, fó-sai katak preokupasaun hosi uma fukun informa ona ba ministériu relevante.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here