Diretór Eskola ESJl 12 Novembru, Aniceto Pedro da Costa. Imajen TATOLI/ Tomé Amado

DILI, 27 juñu 2021 (TATOLI)—Diretór Eskola Ensinu Sekundáriu Jerál (ESJ) 12 Novembru, Becora, Aniceto Pedro da Costa, hateten, família estudante disponível apoiu fundu hodi aselera prosesu reabilitasaun eskola, maibé presiza despaixu hosi Ministériu Edukasaun Juventude no Desportu (MEJD) hodi fortifika inisiativa ne’e.

“Inan-aman sira prontu ona atu apoiu fundu ba eskola tanba sira mós preokupa ho kondisaun eskola ne’e, maibé ami rasik mak seidauk brani atu simu apoiu sira ne’e tanba presiza despaixu ruma hosi Ministru atu reforsa kontribuisaun inan-aman,” Diretór Eskola informa ba Agência TATOLI, via telefónika, domingu ne’e.

Tuir Responsável eskola ne’e, parte eskola presiza konstribuisaun hosi família estudante tanba hakarak prepara kondisaun adekuadu ba estudante sira, tanba ne’e bainhira tempu asina kaderneta eskolár no halo enkontru ho inan-aman, parte eskola sempre informa kona-ba planu ne’e, maibé baze fundamentál atu simu kontribuisaun mak laiha.

“Presiza despaixu nune’e bele iha dalan bainhira hetan ona fundu, bele aprezenta mós relatóriu ba parte ministériu no inan-aman sira,” nia hatutan.

Notísia relevante: MEJD planea reabilita sala aula 680 iha tinan oin

Eskola ne’e kompostu hosi sala aula 23, ho profesór hamutuk 20 ne’ebé kontratadu 15 voluntáriu lima, ho totál estudante hamutuk 1.773.

“Durante ne’e parte eskola hasoru difikuldade tanba laboratóriu no biblioteka laiha, inklui sala aula menus, tanba ne’e presiza kontribuisaun inan-aman kada tinan hosi estudante ida $5 to’o $10,” nia akresenta.

Antes ne’e, Ministru Edukasaun Juventude no Desportu, Armindo Maia, hateten, eskola iha obrigasaun liuhosi Conselho dos Pais bele aprezenta kestaun eskola ba interese estudante, tanba ne’e la presiza despaixu mós eskola iha kbiit uza ninia polítika hodi husu kontribuisaun inan-aman sira, maibé apoiu hirak ne’e tenke implementa duni tuir planu.

“Ita-boot sira tenke jere eskola ho didi’ak atu hetan susesu iha dezenvolvimentu eskola,” nia dehan.

Tuir Ministru, kontribuisaun Conselho dos Pais iha eskola sai pilár importante, tanba ne’e bainhira iha nesesidade bele hato’o ba inan-aman estudante atubele dezenvolve eskola maibé tenke akompaña ho relatóriu eskrita.

MEJD iha ona planu reabilita sala aula hamutuk 680 hosi eskola 221 iha territóriu tomak, iha tinan ne’e.

Jornalista : Tomé Amado

Editora     : Julia Chatarina   

HAKEREK NO HATÁN

Please enter your comment!
Please enter your name here